بەرپرسی ئاگرکوژێنەوەی شارۆچکەی پیشەسازیی کاویان فەریمان لە مەشهەد رایگەیاند، ئێوارەی ئەمڕۆ بەهۆی تەقینەوەیەکەوە ئاگر لە کۆگەی گازی کارخانەی پێترۆنەوتیی شارۆچکەی پیشەسازیی کاویان فریمان کەوتووەتەوە و بەهۆیەوە شەش کۆگە گڕیان گرتووە، بەڵام زیانی گیانی نەبووە.

جەواد جەهاندوست، بەرپرسی ئاگرکوژێنەوەی شارۆچکەی پیشەسازیی کاویان فەریمان ئاماژە بەوە دەدات، دوای کەوتنەوەی ئاگرەکە دەستبەجێ تیمەکانیان گەیشتوونەتە شوێنی رووداوەکە و ئاگرەکەیان کۆنترۆڵ کردووە.

جەهاندوست لەبارەی رووداوەکەوە دەڵێت، بەهۆی گەورەیی ئاگرەکەوە یەکێک لە کۆگەکان لە شوێنەکەی ترازاوە و بۆ کۆنترۆڵکردنی ئاگرەکە لە مەشهەد، فریمان و فەرهادگر تیمی ئاگرکوژێنەوە رەوانە کراوە و رووداوەکە هیچ زیانی گیانیی نەبووە و لێکۆڵینەوە لە هۆکاری ئاگرکەوتنەوەکە دەستیپێکردووە.

جگە لە تیمەکانی ئاگرکوژێنەوە، تیمەکانی پۆلیس و سوپای پاسدارانیش لە کۆنترۆڵی ئاگرەکەدا بەشداربوون.

فریمان لە 75 کیلۆمەتری رۆژهەڵاتی مەشهەدەوەیە و سەر بە خواراسانی رەزەوییە.








رووداو