وەزیری تەندروستیی تورکیا رایگەیاند، لە ماوەی 24 کاژێری رابردوودا 50 هەزار و 545 پشکنین ئەنجامدراون؛ هەزار و 53 تووشبووی نوێی کۆرۆنا تۆمارکراون و 19 تووشبووش گیانیان لەدەستداوە.

بەپێی ئەو ئامارانەی فەخرەدین کۆجا، وەزیری تەندروستیی تورکیا خستوونیەتەڕوو، تاوەکو ئێستا ژمارەی ئەو تووشبووانەی کۆرۆنا کە لە تورکیا گیانیان لەدەستداوە، گەیشتووەتە پێنج هەزار و 260 کەس، ژمارەی تووشبووانی تۆمارکراویش بۆ 207 هەزار و 897 کەس بەرزبووەتەوە، هەزار و 152 تووشبووی کۆرۆناش لەژێر چاودێریی چڕدان.

هەر لە ماوەی 24 کاژێری رابردوودا دوو هەزار و 297 تووشبووی ڤایرۆسی کۆرۆنا چاکبوونەتەوە، کۆی گشتیی ئەو تووشبووانەش کە چاکبوونەتەوە گەیشتووەتە 185 هەزار و 292 کە لە باکووری کوردستان و تورکیادا.

لەکاتێکدا حکومەتی تورکیا هەنگاوی بەرەو ئاساییبوونەوە ناوە، دووبارە ژمارەی تووشبووان رووی لە بەرزبوونەوە کرد و ئەمەش بووە هۆی دواکەوتنی کاتی ئاساییبوونەوە و تووندکردنەوەی رێوشوێنەکان لەو وڵاتەدا.

ئێستا لە چەند پارێزگایەکی باکووری کوردستان و تورکیادا چوونەدەرەوە بەبێ ماسک قەدەخەیە و سەرپێچیکار سزای ماددی دەدرێت.







رووداو