لە چوارچێوەی پرۆژەی "گومەزی ئاسمان"ـدا ئیمارات یاسایەکی نوێی دەرکردووە بۆ کاری فڕۆکە بێفڕۆکەوانەکان و تەکسیی ئاسمانی، بەوەش هەنگاوێک نزیکتر دەبێتەوە لەوەی شار و باڵەخانەکان لە رێگەی ئاسمانەوە بە یەکدییەوە ببەستێتەوە.

محەممەد بن راشد ئالمەکتووم، جێگری سەرۆک و سەرۆکوەزیرانی ئیمارات کە هاوکات حاکمی دووبەیە، یاساکەی دەرکردووە.

پرۆژەی "گومەزی ئاسمان" بەشێوەیەکە کە ئاسمانی دووبەی ئامێری فڕیو بەخۆوە دەبینێت و لە رێگەیەوە باڵەخانە و شار و فڕۆکەخانە بچووکەکانی شارەکان پێکەوە دەبەستێتەوە.

یاسا نوێیەکە رێگەخۆشکەر دەبێت بۆ ئەوەی لە داهاتوودا فڕۆکە بێفڕۆکەوانەکان بۆ خزمەتگوزاریی وەکو تەکسیی فڕیو و گەیاندن (دیلیڤەری) بەکاربهێنرێن.

بەرپرسانی دوبەی ئاماژە بەوە دەکەن، یاساکە بۆ بووژانەوەی ئابووریی دوبەی یارمەتیدەر دەبێت.

سیستەمی گواستنەوەی درۆن (فڕۆکەی بێفڕۆکەوان) بە زۆری بۆ گەیاندنی کەلوپەل، گواستنەوەی سەرنشین، رووپێوی و وێنەگرتن بەکاردەهێنرێت؛ یاسا نوێیەکەش یارمەتیی پێگەی دوبەی دەدات وەکو ناوەندێکی دروستکردنی فڕۆکەی بێفڕۆکەوان و گوێزەرەوەی زیرەک بمێنێتەوە.

لە ساڵی 2017دا دوبەی تاقیکردنەوەی بۆ یەکەمین تەکسیی ئاسمانی کردووە.






رووداو