سەرۆك كۆماری توركیا رایگەیاند، لە ئێستادا ئیستانبوڵی گەورەشاری وڵاتەكەی بوەتە یەكێك لە ناوەندە تەندروستییەكانی جیهان بەهۆی كردنەوەی شارێكی تەندروستی تێیدا.

رەجەب تەییب ئەردۆگان، سەرۆك كۆماری توركیا ئەمڕۆ پێنجشەممە بە هاوڕێیەتی شێنزۆ ئابی، سەرۆك وەزیرانی ژاپۆن لە ئیستانبول ئامادەی مەراسیمی كردنەوەی شاری تەندروستی "باشاك شێهیر چام و ساكورا" بون، كە لە بەشی ئەوروپا-ی ئەوشارە بنیادنراوە.

شاری تەندروستی باشاك دەبێتە یەكێك لە براندە بازرگانییەكانی وڵاتەكەی لە بوارەكانی گەشتیاری و تەندروستیشدا

لەمیانی پێشكەشكردنی وتەیەكدا لەو مەراسیمە، ئەردۆگان رایگەیاند "شاری تەندروستی باشاك دەبێتە یەكێك لە براندە بازرگانییەكانی وڵاتەكەی لە بوارەكانی گەشتیاری و تەندروستیشدا".

بوەتە ناوەندێكی جیهانی لەسەر ئاستی نێودەوڵەتی

ئاماژەی بەوەشكرد، لەئێستادا شاری ئیستانبوڵ بوەتە ناوەندێكی جیهانی لەسەر ئاستی نێودەوڵەتی لەرێگەی ژێرخانی ئابوریی تەكنەلۆجی و باڵەخانەكانییەوە.

سەبارەت بە هاریكارییەكانی نێوان ژاپۆن و توركیا، ئەردۆگان وتی "هەردو وڵات سەركەوتنێكی نمونەییان بەدەستهێناوە، لەكاتێكدا كەرتی تەندروستی وڵاتانی دیكە هەرەسیان هێناوە".

سوپاسی ئەو دو كۆمپانیا ژاپۆنی و توركیەشی كرد كە شارە تەندروستییەكەیان بنیادناوە

هاوكات سەرۆكی توركیا سوپاسی سەرۆك وەزیرانی ژاپۆنی كرد، بۆ بەشداریكردنی لە مەراسیمی كردنەوەی شارە پزیشكییەكەدا و سوپاسی ئەو دو كۆمپانیا ژاپۆنی و توركیەشی كرد كە شارە تەندروستییەكەیان بنیادناوە.

لە بەشێكی دیكەی وتەكانیدا ئەردۆگان باسی لەوەكرد، وڵاتەكەی پرۆژەی زۆر گرنگی هاوشێوەی پردی "عوسمان غازی" و تونێلی مارمارای" لەگەڵ كۆمپانیا ژاپۆنییەكان بەئەنجامگەیاندوە.

رونیشیكردەوە، ئەمڕۆ بە كردنەوەی شارێكی تەندروستی، هەنگاوێكی نوێی بەرەوپێشەوە لە پەیوەندییە هاوڕێیەتییەكەی توركیا-ژاپۆن نرا، كە رەگەكانی داكوتیوە و هەمیشەیی دەبێت.








خەندان