وەزیری دەرەوەی ئەمریکا دەسەڵاتدارانی کۆماری ئیسلامیی ئێران بە نازییەکان ناودەبات.

مایک پۆمپیۆ، وەزیری دەرەوەی ئەمریکا لە دووەم ساڵیادی کشانەوەی وڵاتەکەی لە رێککەوتنی ناوکیی وڵاتانی پێنج + یەک و ئێران، بەیاننامەیەکی دەرکردووە.

لە بەیاننامەکەدا، کە وەزارەتی دەرەوە بڵاوی کردووەتەوە، مایک پۆمپیۆ دەسەڵاتدارانی ئێران بە نازی ناودەبات، وەک ئاماژەیەک بۆ نازییەکانی ئەڵمانیا بە سەرۆکایەتیی ئەدۆڵف هیتلەر و وڵاتەکەشیان بە ”گەورەترین پاڵپشتی بەرەی دژی جوولەکە“ ناو بردووە.

وەزیری دەرەوەی ئەمریکا هەروەها رایگەیاندووە، 75 ساڵ بەر لە ئێستا ئەمریکا و هاوپەیمانان نازییەکانیان لەناو برد، ”ئێستاش مەترسییەکی دیکە لەسەر ئاشتیی جیهانی دروست بووە“، کە مەبەستی ئێرانە.

پۆمپیۆ پێی وایە دوای کشانەوەی وڵاتەکەی لە رێککەوتنی ناوکی، ئاسایشی ئەمریکا و رۆژهەڵاتی ناوەڕاست ئارامییان بەخۆیانەوە دیوە.

شەوی 8/5/2018، دۆناڵد ترەمپی سەرۆکی ئەمریکا بڕیاری کشانەوەی وڵاتەکەی لە رێککەوتنی ناوکیی ئێران و وڵاتانی پێنج + یەک، واژۆ کرد.

رێککەوتنی ناوکیی ئێران و وڵاتانی پێنج + یەک لە سەرەتای نیسانی 2015 لە شاری لۆزان لە سویسڕا واژۆ کرا، کە بەپێی ئەو رێککەوتنە ئێران دەستبەرداری دروستکردنی چەکی ناوکی دەبێت و ئەمریکاش سزاکانی لەسەر ئەو وڵاتە سووک دەکات.

وڵاتانی پێنج + یەک بریتین لە پێنج وڵاتی ئەندامی هەمیشەیی ئەنجومەنی ئاسایشی نێودەوڵەتی (ئەمریکا، فەرەنسا، رووسیا، بەریتانیا و چین) و ئەڵمانیا پێک دێت.



باسنیوز