لە توركیا رۆژانە زیاتر لە سێ هەزار تووشبووی ڤایرۆسی كۆرۆنا رادەگەیەندرا، بەڵام فەخرەدین كۆجا وەزیری تەندروستیی توركیا رای گەیاند، بۆ یەكەمجار لە ماوەی ٢٤ سەعاتی رابردوودا ژمارەی تووشبوو لە تەواوی توركیا لە خوار دوو هەزار کەسەوە بووە.

بە گوتەی كۆجا كە لە پێگەی خۆی لە تویتەر بڵاوی كردووەتەوە، لە ماوەی ٢٤ سەعاتی رابردوودا، هەزار و 983 كەس لە توركیا تووشی كۆرۆنا بوون و ٧٨ كەسیش گیانیان لەدەست داوە.

كۆجا ئاشكرای کردووە هەر لە ماوەی ٢٤ سەعاتی رابردوودا ٤ هەزار و ٤٥١ تووشبوو چاك بوونەتەوە و دەڵێت ئەوە ئاماژەیەكی باشە كە بۆ یەكەمجارە ژمارەی تووشبوو لە توركیا گەیشتووەتە خوار ٢ هەزار و كەمی ماوە مەترسیی كۆرۆنا تێپەڕێنین".

ژمارەی گشتیی تووشبوو بە كۆرۆنا لە توركیا گەیشتووەتە ١٢٤ هەزار و ٣٧٥، هەروەها ژمارەی گیان لەدەستدانیش گەیشتووەتە سێ هەزار و ٣٣٦.

لە توركیا لە ١١ی ٣ی ٢٠٢٠ كە یەكەم رۆژی راگەیاندنی تووشبووی كۆرۆنا بوو لەو وڵاتە، تاكوو ٢ی ٥ی ٢٠٢٠ ژمارەی تێستەكانی بۆ یەك ملیۆن و ١١١ هەزار بەرز كردووەتەوە، بۆیە كۆجا ئەمەی بە سەركەوتنێكی گەورە هەژمار كرد.

زۆرترین ژمارەی تووشبوو لە ئیستانبۆڵ تۆمار كراوە، كە ٢٨ هەزار و ١٤ كەسن و ژمارەی گیان لەدەستدانیش هەر لەو شارەدا بە بەرزی ماوەتەوە.

بە گوێرەی گوتەی كۆجا، لە ٢٥ شاری توركیا كۆرۆنا هیچ كەسێكی نەكوشتووە و تەنیا تووشبووی لێ تۆمار كراوە.









باسنيوز