سەرۆکی ئەمریکا گەڕاندنەوەی هێزەکانی وڵاتەکەی لە ئەفغانستان بەشێوەیەکی خێرا، رادەگەیەنێت.

دۆناڵد ترەمپی سەرۆکی ئەمریکا دوای واژۆکردنی رێککەوتنی راگرتنی شەڕ لەنێوان وڵاتەکەی و بزووتنەوەی تاڵیبانی ئەفغانی، رایگەیاندووە، هێزە ئەمریکییەکان لەماوەی 14 مانگ لە ئەفغانستان دەکێشنەوە.

کشاندنەوەی هێزەکانی ئەمریکا لە ئەفغانستان بەرامبەر دوو مەرجی ئەمریکایە بۆ تاڵیبان، کە بریتین لە؛

- کۆتاییهێنان بە پەیوەندیی تاڵیبان لەگەڵ رێکخراوی تیرۆریستیی قاعیدە.

- بەردەوامیی تاڵیبان لە شەڕی دژی رێکخراوی تیرۆریستی داعش.

بەپێی رێککەوتنەکە، کە رۆژی شەممە 29-2-2020 لە دەوحەی پایتەختی قەتەر واژۆکرا، ئەمریکا و هاوپەیمانان لە ماوەی 135 رۆژدا هەشت هەزار و 600 سەرباز لە ئەفغانستان دەکێشنەوە.

تاڵیبان بزووتنەوەیەکی ئیسلامیی توندڕەوەی ئەفغانییە، پەیوەندییەکی بەهێزی لەگەل رێکخراوی تیرۆریستی قاعیدە هەیە و بە یەکێک لە رێکخراوە تیرۆریستییەکان دادەندرێت.

تاڵیبان لە ساڵی 1994 دروست بووە و لە ساڵی 1996 دەستی بەسەر حوکمڕانیی ئەفغانستاندا گرت و بەهۆی پاڵپشتیکردنی رێکخراوی تیرۆریستیی قاعیدە، ئەمریکا لە ساڵی 2001 حوکمڕانیی تاڵیبانی رووخاند.







باسنیوز