ئەو پیاوەی دوێنێ هەوڵیدا لە میونشن خۆی بسوتێنێت خەڵکی عێراقە. پۆلیس دەڵێت، ئەو کەسە پلانی نەبووە ئازار بە خەڵکی بگەیێنێت و تەنیا ویستویەتی ئازارگەیاندنەکە خۆی بگرێتەوە.

پۆلیسی ئەڵمانیا رایگەیاند، پیاوەکە بە رەچەڵەک عێراقییە، تەمەنی 50 ساڵە و دانیشتووی ئەڵمانیایە و ویستویەتی لەو رێگەیەوە سەرنجی بەرپرسانی وڵاتانی بەشدار لە کۆنفرانسی ئاسایشی میونشن بۆ بارودۆخی سیاسیی عێراق و مەینەتییەکانی خەڵکی عێراق رابکێشێت.

رۆژی شەممە نزیکەی 400 کەس لە شاری میونشن کۆبوونەوە و دژی بەڕێوەچوونی کۆنفرانسی ئاسایشی میونشن خۆپێشاندانیان ئەنجامدا.

ئەو پیاوە عێراقییەش سەرەتا لەناو خۆپێشاندەراندا نەبوو، بەڵام دواتر بەنزینی رژاند بەسەر خۆیدا و بە چەرخێکەوە رایکرد بۆلای ئەو خەڵکە ناڕازیە.

پۆلیس دەڵێت، پیاوەکە کەمێک برینداربووە و گواستراوەتەوە بۆ نەخۆشخانە بۆئەوەی چارەسەری بۆ بکرێت.