بە گوتەی گوتەبێژی کاروباری فەزایی وەزارەتی بەرگریی ئێران، دوێنێ کە بڕیار بوو کەشتیی ئاسمانیی "زەفەر" ڕەوانەی بۆشایی ئاسامن بکرێت، بەهۆی نەبوونی خێرایی پێویست، نەیتوانیوە لە بۆشایی ئاسمان جێگر ببێت و شکستی هێناوە.

هەرچەند هەندێ لە میدیا فەرمییەکانی ئێران بە وردی ئاماژەیان بەو شکستە نەکردووە و ڕایان گەیاندووە هەڵدانی ئەو کەشتییە ئاسمانییە کاتەکەی گۆڕاوە، بەڵام زانیارییەکان باس لەوە دەکەن کە بەهۆی بێ پلانی و شکستهێنانی ئەو پرۆژەیە، وەزارەتەکانی بەرگریی و تەکنۆلۆژیای ئێران تووشی کێشە بوون و هیچ زانیاری و پێوشوێنیکیان لەو کەشتییە ئاسمانییە نییە.

لەمبارەوە محەمەد جەواد ئازەری جەهرومی وەزیری پەیوەندی و تەکنۆلۆژیای ئێران بە میدیاکانی ڕاگەیاندووە: "کەشتیی ئاسمانیی زەفەر گەیشتە ٦٤٠ کیلۆمەتریی ئاسمان، بەڵام بۆ جێگیربوونی ئەو کەشتییە لە بۆشایی ئاسمان دەبوا بگاتە خێرایی حەوت هەزار و ٤٠٠ کیلۆمەتر، بەڵام ئەو خێراییەی مسۆگەر نەکرد".

ئاماژەی بەوەش کردووە: "کەشتییە ئاسمانییەکە تووشی کەمیی خێرایی بووە و لە بۆشایی ئاسمان جێگر نەبووە و لە ئۆقیانووسی هیند کەوتووەتە خوارەوە".

ئازەری جەهرومی ڕاشی گەیاندووە: "پێچەوانەی کەشتیی ئاسمانیی "پەیام" کە گرفتی تەکنۆلۆژیی هەبووە، ئەمجارە گرفت لە مەکینەی کەشتییەکەدا بووە".

کەشتیی ئاسمانیی "زەفەر" کە کێشی 113 کیلۆ بووە، لەڕێگەی مووشەکی "سیمورغ"ەوە بۆ بەرزایی ٥٣٠ کیلۆمەتریی هەڵدراوە و سەرەنجام شکتی هێنا و هەندێ زانیاریی خۆجێی باس لەوە دەکەن کە پارچەکانی ئەو کەشتییە ئاسمانییە لە پارێزگای سیستان و بەلووچستان کەوتووەتە خوارەوە.

بە گوێرەی زانیارییەکانی ماڵپەڕی فارسیی "ڕادیۆ فەردا" لە ماوەی ١١ مانگی ڕابردوودا ئەمە چوارەمین جارە هەڵدانی کەشتییە ئاسمانییەکانی ئێران سەرەڕای ئەو هەموو خەرج و هەزینانەی بۆی دەکرێت، شکست دێنن و ئێران ساڵی 2019 سێ جار هەوڵی دا کەشتیی ئاسمانیی ناهید بنێرێتە بۆشایی ئاسمان، بەڵام تێیدا سەرکەتوو نەبوو و ئەمەش لە ئاستی ناوخۆیی و نیودەوڵەتیدا لەڕووی شکستهێنانی زانیاری و تەکنۆلۆژیا زۆر بە زیانی ئێران شکایەوە.

هاوکات لە ساڵی 2018شدا ئێران دوو جار هەوڵی ئەو کارەی دا و سەرکەوتوو نەبوو و هاوکات لە لە دەیەی ٨٠ی هەتاویشدا ئێران دوو جار لە هەڵدانی کەشتیی ئاسمانیدا شکستی هێناوە.





باسنیوز