شارێکی لیبیا لەژێر دەسەڵاتی هێزەکانی سەر بە حکوومەتی ویفاقی نیشتمانیی لیبیا، کە هاوپەیمانی تورکیایە، دەرهێنرا.

سوپای نیشتمانیی لیبیا لە بەیاننامەیەکدا رایگەیاندووە، رۆژی دووشەممە 6-1-2020، هێزەکانیان هێرشیان کردووەتە سەر شاری سێرت لە باکووری وڵاتەکە و توانیویانە دەستی بەسەردا بگرن.

شاری سێرت لە ساڵی 2016ـەوە لەژێر دەسەڵاتی گرووپە چەکدارییەکانی سەر بە حکوومەتی ویفاقی نیشتمانیی لیبیایە.

تورکیا، کە رەجەب تەییب ئەردۆغان سەرۆکایەتی دەکات و لەلایەن پارتی داد و گەشەپێدان (ئاکەپە) بەڕێوە دەبرێت، کە پارتێکی سەر بە رەوتی ئیخوان موسلیمینە، بە ناردنی چەک و چەکدار و واژۆکردنی گرێبەستی ئابووریی و ئەمنی، هاوکاریی حکوومەتی ویفاقی نیشتمانیی لیبیا دەکات، کە ئەو حکوومەتەی لیبیا لەلایەن سەرکردەکانی ئیخوان موسلیمین پێکهێنراوە و لەگەڵ سوپای نیشتمانیی وڵاتەکەی تووشی شەڕی ناوخۆیی بووە.

وڵاتانی سعودیە، ئیمارات، میسر و بەحرێن، کە ئیخوان موسلیمینیان خستووەتە ناو لیستی تیرۆرەوە، پاڵپشتیی سوپای نیشتمانیی لیبیا دەکەن.









باسنیووز