مارک ئێسپەر لە پێنتاگۆن بە پەیامنێرانی راگەیاند، "ئایا پێموایە دەکرێت ئەوان کارێک بکەن؟ بەڵێ. لەوانەیە پەشیمانیش ببنەوە. ئامادەین بۆ بەرگریکردن لە خۆمان و رێگەگرتن لە هەر مامەڵەیەکی دیکەی خراپ لەلایەن ئەو گرووپانەوە، کە هەموویان لەلایەن ئێرانەوە پاڵپشتی دەکرێن و رێنماییان پێدەدرێت".

وەزیری بەرگریی ئەمریکا گوتی، حکومەتی وڵاتەکەی رێکاری پێشوەختە دەگرێتەبەر، ئەگەر زانی هێرشی دیکە ئەنجام دەدرێت و رایگەیاند، "یاریەکە گۆڕاوە. ئامادەین ئەوەی پێویست بێت بیکەین بۆ پاراستنی ستاف و بەرژەوەندی و هاوبەشەکانمان لە ناوچەکەدا".

هاوکات مارک میڵی، سوپاسالاری ئەمریکا هۆشداری تووندی دایە ئەندام و لایەنگرانی حەشدی شەعبی و خەڵکی دیکە لە ئەگەری هەڵکوتانەوەسەر باڵیۆزخانەی ئەمریکا لە بەغدا و گوتی، هەرکەسێک بیەوێت ئەو کارە بکات رووبەڕووی ئەنجامی تووند و چاوەڕواننەکراو دەبێتەوە.