ئەسەدوڵا عەباسی، گوتەبێژی دەستەی سەرۆکایەتیی پەرلەمانی ئێران، ئەمڕۆ ئاشکرای کرد نامەی دەست لەکارکێشانەوەی وەزیری کشتوکاڵ لەلایەن حەسەن ڕۆحانی سەرۆک کۆمارەوە قەبووڵ کراوە.

بەپێی زانیاریی میدیا فەرمییەکانی ئێران بڵاویان کردووە کۆبوونەوەی بانگهێشت و لێپرسینەوەی مەحموود حوجەتی، وەزیری کشتوکاڵی ئێران کە بڕیار بوو سبەی سێشەممە بەریوە بچێت، هەڵوەشاوەتەوە.

سەرپێچی لە هاوردەی بەرهەم کشتوکاڵییەکان، نەبوونی هەڵوێستی گونجاو لەگەڵ بەڕێوەبەرە گەندەڵەکان و سەرپێچیکردن لە یاساکان لە هەناردە و هاوردەکردنی بەروبومە کشتوکاڵییەکان لەو پرسانەن کە بوونەتە هۆکاری دەست لەکارکێشانەوەی وەزیری کشتوکاڵی ئێران.

لەمبارەوە ڕۆژنامەی (ئافتابی یەزد) وێڕای بڵاوکردنەوەی هەواڵی لێپرسینەوە لە وەزیری کشتوکاڵ، بەتەمایە پاش گرانبوونی بەهای بەنزین و خۆپیشاندان و ناڕەزاییەکان لە ئێران، دەیەوێ بە بانگهێشت و لێپرسینەوەی وەزیرەکانی کابینەی ڕۆحانی، بیسەلمێنێت کە کاریگەریی هەیە.

هەمان ڕۆژنامە هاوکات باسی لە ئەگەری لێپرسینەوە لە دوو وەزیری نەوت و ناوخۆ کردووە و ئەو پرسیارەی هێناوەتە گۆڕی کە لێپرسینەوە لەم سێ وەزیرە نیشانەی (بێ میمانەیی) بە پەرلەمان لە پرسی گرانبوونی بەنزیندا نەبووە.













باسنيوز