سەرۆكی پارتی باش لە توركیا، لە دووەم ساڵیادی دامەزراندنی پارتەكەیاندا ئاهەنگێكی رێك خست و لەوێدا داوای لە رەجەب تەییب ئەردۆغان كرد كە هاوكارییان بكات تا سیستەمی توركیا لە سەرۆكایەتییەوە بۆ پەرلەمانی بگۆڕن.

مەراڵ ئاكشەنەر سەرۆكی پارتی باش، لە ئاهەنگی تێپەڕینی دوو ساڵ بەسەر دامەزراندنی پارتەكەیدا، ئاهەنگێكی رێك خست و سەرۆكی هەموو پارتە ئۆپۆزسیۆنەكانی توركیای بانگهێشت كردبوو جگە لە هەدەپە، لەوێدا ئاكشەنەر رەخنەی لە سیستەمی سەرۆكایەتیی توركیا گرت و داوای گۆڕینی ئەو سیستەمەی كرد.

ئاكشەنەر ئەمڕۆ شەممە ٢٦_١٠_٢٠١٩ لە وتارێكدا پشتگیریی پارتەكەی خۆی و هەموو پارتە ئۆپۆزسیۆنەكانی توركیای بۆ سیستەمی پەرلەمانی دووپات كردەوە.

گوتیشی: "بەناوی پارتی باش و جەهەپە و پارتی سەعادەت و هەموو پارتە ئۆپۆزسیۆنەكانی توركیا، بە پارتی دەسەڵات دەڵێم فەرموون هاوكارمان بن بۆ ئەوەی سیستەمی سیاسیی توركیا لە سەرۆكایەتییەوە بۆ پەرلەمانی بگۆڕین، چونكە دەركەوت سیستەمی سەرۆكایەتی چ زیانێكی گەورەی لە توركیا داوە".

بە گوێرەی گوتەی ئاكشەنەر، ئەوان وەكوو پارتەكانی ئۆپۆزسیۆنی توركیا، پڕۆژە یاسایەكیان ئامادە كردووە و داوای گەڕانەوەی سیستەمی پەرلەمانی دەكەن، بەڵام ئەگەر پارتی دەسەڵات پشتگیرییان نەكات، پڕۆژە یاسایەكە لە پەرلەمان دەنگی پێویست ناهێنێت.

لە ساڵی ١٩٢٣ سیستەمی سیاسیی توركیا پەرلەمانی بووە و تا ساڵی ٢٠١٨ ئەو سیستەمە لە توركیا كاری پێ كرا، بەڵام لەسەر داوای (ئەردۆغان و مەهەپە) دەستوور هەموار كرایەوە و پاشان لە ریفراندۆمێكدا سیستەمی توركیا بووە سەرۆكایەتی.












باسنيوز