کۆشکی کرملین (کۆشکی سەرۆکایەتیی رووسیا) بە توندیی وەڵامی سەرۆکی ئەمریکا دەداتەوە.

لە راگەیەندراوێکدا، کە میدیاکانی رووسیا بڵاویان کردووەتەوە، کۆشکی کرملین رایگەیاندووە، ڤلادیمێر پوتینی سەرۆکی ئەو وڵاتە ئامادەیە بۆ تاوتوێ و گفتوگۆ لەبارەی چارەسەرکردنی کێشەکان لەگەڵ دۆناڵد ترەمپی سەرۆکی ئەمریکا.

کۆشکی کرملین بە توندی وەڵامی دۆناڵد ترەمپی داوەتەوە و رایگەیاندووە، نیمچەدوورگەی کریمیا بەشێکی دانەبڕاوە لە خاکی رووسیا و هەرگیز گفتوگۆی لەبارەوە ناکرێت.

بڕیارە رۆژی 16/7/2018، ڤلادیمێر پوتین و دۆناڵد ترەمپ لە شاری هێلسینکیی پایتەختی فینلەندا کۆ ببنەوە.

پێشتر سەرۆکی ئەمریکا رایگەیاندبوو، لە کۆبوونەوەکەیدا لەگەڵ سەرۆکی رووسیا، ”هەموو شتێک“ باس دەکات و ناوی چەند تەوەرێکیشی ئاشکرا کرد، کە بریتین لە؛


- دەستوەردانی رووسیا لە هەڵبژاردنی سەرۆکایەتیی ئەمریکا لە ساڵی 2016.

- ناکۆکیی رووسیا و ئۆکراینا.

- شەڕی ناوخۆیی سووریا و چۆنێتیی چارەسەرکردنی.


سوپای رووسیا لە ناوەڕاستی مانگی 3ـی 2014 نیمچە دوورگەی کریمیای بە زەبری هێز خستەوە سەر نەخشەی رووسیا و کرایە هەرێمێک لە رووسیا.











باسنيوز