سەرۆک کۆماری ئێران رایدەگەیەنێت، کە هەنگاوەکەی ئەم دواییەی سەرۆکی ئەمریکا ترسێنەرە.



رۆژی سێشەممە 26/6/2018، لە وتەیەکدا، کە کەناڵە فەرمییەکانی ئێران بەشێوەیەکی راستەوخۆ پەخشیان کرد، حەسەن رۆحانیی سەرۆک کۆماری ئێران رایگەیاندووە، ئێرانییەکان چۆک بۆ گوشارەکانی ئەمریکادا نادەن و ”بەرگریی لە سەربەخۆیی و بەهاکانیان دەکەن“.



حەسەن رۆحانی رەخنەی لە کشانەوەی ئەمریکا لە رێککەوتننامەی ناوکیی ئێران و وڵاتانی 5+1 گرتووە و رایگەیاندووە، هەنگاوەکەی دۆناڵد ترەمپی سەۆکی ئەمریکا لە رێککەوتنەکە ”ترسێنەرە و نایاساییە و زیانی بە ناوبانگی ئەمریکا گەیاندووە“.



سەرۆک کۆماری ئێران ئاماژەی بەوەش داوە، کە وڵاتەکەی مافی خۆیەتی و پارێزگاریی لە پیتاندنی یۆرانیۆم بۆ مەبەستی ئاشتی دەکات.



شەوی سێشەممە 8/5/2018، دۆناڵد ترەمپی سەرۆکی ئەمریکا بڕیاری کشانەوەی وڵاتەکەی لە رێککەوتنی ناوکیی ئێران و وڵاتانی پێنج + یەک، واژۆ کرد.



رێککەوتنی ناوکیی ئێران و وڵاتانی پێنج + یەک لە سەرەتای نیسانی 2015 لە شاری لۆزان لە سویسڕا واژۆ کرا، کە بەپێی ئەو رێککەوتنە ئێران دەستبەرداری دروستکردنی چەکی ناوکی دەبێت و ئەمریکاش سزاکانی لەسەر ئەو وڵاتە سووک دەکات.



وڵاتانی پێنج + یەک بریتین لە پێنج وڵاتی ئەندامی هەمیشەیی ئەنجومەنی ئاسایشی نێودەوڵەتی (ئەمریکا، فەرەنسا، رووسیا، بەریتانیا و چین) و ئەڵمانیا پێک دێت.





باسنیوز