سکرتێری گشتیی نەتەوە یەکگرتووەکان داوای راگرتنی شەڕ لە باشووری رۆژئاوای سووریا دەکات.



ستیڤان دۆگاریک، گوتەبێژی ئەنتۆنیۆ گۆتێرسی سکرتێری گشتیی نەتەوە یەکگرتووەکان رایگەیاندووە، گۆتێرس لە هێرش و شەڕەکانی باشووری رۆژئاوای سووریا لە نزیک سنوورەکانی ئیسرائیل، نیگەرانە و پێی وایە مەترسی لەسەر ئاسایشی ناوچەکە دروست دەکات.



ستیڤان دۆگاریک هەروەها رایگەیاندووە، هێرشی سوپا و میلیشیاکانی سەر بە رژێمی سووریا بۆ سەر گرووپەکانی ئۆپۆزیسیۆن، کە جگە لە کوژرانی خەڵکی ناوجەکە، دەبنە هۆی ئاوارەبوونی خەڵک و چوونیان بەرەو ئوردن.



چەندین میلیشیای سەر بە حزبوڵڵای لوبنان و کۆماری ئیسلامیی ئێران بۆ پاڵپشتیی لە رژێمی سووریا، لە باشووری دیمەشق (باشووری رۆژئاوای سووریا) بڵاو بوونەتەوە.



لە مانگی ئاداری2011ـەوە شەڕی ناوخۆیی لە سووریا لەنێوان گرووپەکانی ئۆپۆزیسیۆن، رێکخراوە تیرۆریستییەکانی داعش و قاعیدە و رژێمی سووریا دروست بووە.



بەھۆی ئەو شەڕانەوە، کە سەراپای وڵاتەکەی گرتووەتەوە، زیاتر لە پێنج ملیۆن ھاووڵاتی لە ناوخۆی وڵاتەکە، بۆ وڵاتانی دەوروبەر و جیھان ئاوارە بوون و زیاتر لە نیو ملیۆن کەسیش گیانیان لەدەست داوە.



باسنیوز