بنیامین نەتانیاهۆ، سەرۆکوەزیرانی ئیسرائیل، چەند کاتژمێر دوای هاتنە دەرەوەی ئەمریکا لە ڕێککەوتنی ئەتۆمی لەگەڵ ئێران، لە مسکۆ لەگەڵ ڤلادیمیر پۆتین سەرکۆماری ڕووسیا کۆ بووەوە.

شەوی ڕابردوو نەتانیاهۆ، وێڕای پشتگیری لەو هەڵوێستەی ئەمریکا، ڕای گەیاند: "بەرەبەیانی ئەمڕۆ بۆ دیدارێکی گرنگ لەگەڵ ڤلادیمیر پۆتین، بۆ ڕووسیا دەکەومە ڕێ".

نەتانیاهۆ لە تویتێکدا لە تۆڕی کۆمەڵایەتیی (تویتەر) نووسیویە: "هەموو کات دیدارەکانی ئێمە گرنگن، بەتایبەتی دیداری ئەمجارە و بە لەبەرچاوگرتنی دۆخی سووریا، پێویستە هەماهەنگیی ئەمنی لە نێوان سوپی ڕووسیا و ئیسرائیلدا درێژەیان پێ بدرێت".

هەتا ئێستا لەبارەی ناوەرۆکی دیداری نێوان، بنیامین نەتانیاهۆ و پۆتین، زانیاریی ورد بڵاو نەکراوەتەوە.

ئەمڕۆ چوارشەممە حكوومەتی رووسیا بە بۆنەی 73یەمین ساڵڕۆژی سەرکەوتنی یەکێتیی سۆڤیەتی بەسەر نازییەکاندا، ڕێوڕەسمێکی بەشکۆی سەربازیی ساز کرد کە کۆمەڵێک لە سەرۆکوەزیر و سەرکۆماری وڵاتانی ناوچە و ئەورووپی بانگهێشتی ئەو ڕێوڕەسمە کراون.

نێچیرڤان بارزانی، سەرۆکوەزیرانی هەرێمی کوردستانیش بە بانهێشتی فەرمیی ڤلادیمیر پۆتین سەفەری ڕووسیای کردووە و وێڕای دیدار لەگەڵ سەرکۆماری ئەو وڵاتە لەگەڵ چەند بەرپرسێکی دیکەش کۆ دەبێتەوە.









باسنیوز