بە گوتەی لێپرسراوانی نەخۆشخانەیەک لە "غووتەی ڕۆژهەڵاتی دیمەشق" کەلە کۆنترۆڵی دژبەرانی حکوومەتی سووریا دایە، لە هێرشی سوپای سووریادا بۆ سەر خەڵکی سڤیل، غازی ژەهراوی بەکار هاتووە.



تۆڕی میدیایی (بی‌بی‌سی) لەزاری بەرپرسانی ئەو نەخۆشخانەیەی غووتەی ڕۆژهەڵاتەوە بڵاوی کردووەتەوە، کە پاش تەقینەوەیەک، هەموو بەڵگە و شایەتعاڵەکان باس لەوە دەکەن کە غازی (کۆلر) بەەرز بووەتەوە و خەڵک تووشی گرفتی هەناسە دان بوون.



بەپێی هەمان سەرچاوە، 18 کەس تووشی گرفت بوون و خراونەتە ژێر چاودێریی پزیشکییەوە و منداڵێکیش بەو بۆنەوە گیانی لەدەست داوە.



ئەم ڕاپۆرتانە لە کاتێک دان کە حکوومەتی سووریا دیسان حاشای لە هەرچەشنە هێرشێکی کیمیایی لەو ناوچەیە کردووە.



شەڕ و پێکدادانەکان لە غووتەی ڕۆژهەڵاتی دیمەشق، سەرەڕای بڕیای ئەنجومەنی ئاسایش بۆ ئاگربەستی یەک مانگە لە سووریا و بەتایبەت لەو ناوچەیە، هێشتا بەردەوامە.



بەپێی ئامار و داتاکان لە ماوەی شەڕ و پێکدادانەکانی دوو هەفتەی ڕابردوودا لە غووتەی ڕۆژهەڵات لە نێوان هێزەکانی سوپای سووریا و ئۆپۆزیسیۆن هەتا ئێستا زیاتر لە 500 هاووڵاتیی سڤیل کوژراون.



ئەنجومەنی ئاسایش پاش چەند ڕۆژ مشتومڕ، سەرەنجام ڕۆژی شەممە 2018/2/24 بە کۆی دەنگ بڕیارنامەی ئاگربەستی 30 ڕۆژەی لە سووریا پەسەند کرد.






باسنيوز