باڵیۆزی شانشینی بەحرەین لە عێراق رایدەگەیەنێت، کە چەندین تاوانباری هەڵاتوو لە بەحرەین هاتوونەتە عێراق و بوونەتە چەکداری میلیشیاکانی حەشدی شەعبی.

سەڵاح ئەلمالکی، باڵیۆزی بەحرەین لە بەغدا لە چاوپێکەوتنێکی ماڵپەڕی (ئەلغەد پرێس)دا رایگەیاندووە، بەڵگەیان هەیە، کە ئەو تاوانبارە بەحرەینیانەی لە وڵاتەکەیان داواکراون، لە نێوان عێراق، لوبنان و ئێراندا هاتوچۆ دەکەن.

سەڵاح ئەلمالکی هەروەها رایگەیاندووە، ئەو کەسانە، بە یاسای تیرۆر لە بەحرەین داواکراون و هەڵاتوون، ئێستاش چەکداری میلیشیا جیاوازەکانی حەشدی شەعبین و چەندین جار وێنە و گرتەی ڤیدیۆیی خۆیان لەناو ئەو میلیشیایانە، بڵاو کردووەتەوە.

هەروەک حکوومەتی بەحرەین رایگەیاندووە، ئەو کەسانەی لەو وڵاتە هەڵاتوون، زۆربەیان هاووڵاتیی شیعەمەزهەبن و ”بە دەست لەپشتدانی ئێران“، هەوڵی ئەنجامدانی کردەی تیرۆریستییان لە بەحرەین داوە.









باسنيوز