جه‌یمس ماتیس وه‌زیری‌ به‌رگری‌ ئه‌مه‌ریكا رایگه‌یاند، له‌گه‌ڵ هاوپه‌یمانه‌كانیان له‌ئاسیا قسه‌ده‌كه‌ن له‌باره‌ی‌ كۆریای‌ باكورو ئه‌و قه‌یرانه‌ی‌ به‌هۆی‌ كاره‌ ئیستیفزازییه‌كانی‌ پیۆنگ یانگه‌وه‌ دروستبوون، له‌سه‌ردانێكیدا بۆ ناوچه‌كه‌ كه‌ ئه‌مڕۆ به‌كۆبوونه‌وه‌ی‌ له‌گه‌ڵ سه‌ركرده‌كانی‌ فلیپین ده‌ستپێده‌كات.

سه‌ردانه‌كه‌ی‌ ماتیس بۆ ئاسیا كه‌ هه‌ریه‌كه‌ له‌ تایلاندو كۆریای‌ باشور-يش ده‌گرێته‌وه‌، پێش چه‌ند هه‌فته‌یه‌ك دێت له‌یه‌كه‌م سه‌ردانی‌ دۆناڵد تره‌مپ بۆ ئاسیا.

بڕیاره‌ ماتیس كه‌ جه‌خت له‌سه‌ر چاره‌سه‌ری‌ دیبلۆماسی ده‌كاته‌وه‌، له‌گه‌ڵ وه‌زیرانی‌ به‌رگری‌ یابان و كۆریا باشور كۆبێته‌وه‌.

ماتیس وتی‌ "قه‌یرانی‌ ئاسایشی‌ هه‌رێمایه‌تی‌ تاوتوێده‌كه‌ین، كه‌ به‌هۆی‌ كاره‌ ئیستیفزازییه‌كانی‌ كۆریای‌ باكوره‌وه‌ دروستبوون".

په‌یوه‌ندییه‌كانی‌ ئه‌مه‌ریكاو كۆریای‌ باكور له‌ئێستادا له‌و په‌ڕی‌ گرژیدایه‌، ئه‌وه‌ش به‌هۆی‌ تاقیكردنه‌وه‌ موشه‌كی‌ و ئه‌تۆمییه‌كانی‌ كۆریای‌ باكور و هه‌ڕه‌شه‌كانی‌ ئه‌و وڵاته‌ له‌ئه‌مه‌ریكاو هاوپه‌یمانه‌كانی‌.

دۆناڵد تره‌مپ مانگی‌ رابردوو له‌وته‌یه‌كیدا له‌به‌رده‌م كۆمه‌ڵه‌ی‌ گشتی‌ نه‌ته‌وه‌یه‌كگرتووه‌كان، هه‌ڕه‌شه‌ی‌ خاپوركردنی‌ كۆریای‌ باكوری‌ كرد، ئه‌گه‌ر پێویست بكات كارێك بكه‌ن بۆ به‌رگری‌ له‌ویلایه‌ته‌ یه‌كگرتووه‌كان و هاوپه‌یمانه‌كانی‌.





خه‌ندان-