لە ئەنجامی ھێرشێکی چەکدارانی بزووتنەوەی تیرۆریستی تاڵیبان بۆ سەر چەند خاڵێکی پشکنین، پێنج چەکداری ئەو بزووتنەوەیە، کوژران، لە نێوانیاندا سەرکردەیەکیشی تێدایە.



ئەمڕۆ سێشەممە 11/7/2017 پۆلیسی ئەفغانستان لە بەیاننامەیەکدا ڕایگەیاندووە کە لە ئەنجامی ھێرشی چەکدارانی بزووتنەوەی تیرۆریستی تاڵیبان بۆ سەر چەند خاڵێکی پشکنین و پاش ڕووبەڕووبوونەوەی ھێزەکانیان لەگەڵ چەکدارانی تاڵیبان، پێنج چەکداری ئەو بزووتنەوەیە کوژران کە لەنێویاندا (عەزام جۆل)ی سەرکردەی دیاری ئەو بزووتنەوەی تێدایە.



لە بەیاننامەکەی پۆلیسدا ھاتووە: "بەرەبەیانی ئەمڕۆ سێ شەممە، چەکدارانی تاڵیبان ھێرشێکی لەناکاویان کردە سەر چەند خاڵێکی پشکنین لە ھەرێمی لەغمانی ڕۆژھەڵاتی ئەو وڵاتە، پاش وەڵامدانەوە و ڕووبەڕووبوونەوەیان لەگەڵ ھێزەکانی ئاسایش، پێنج چەکداری ئەو ڕێکخراوە کوژران و ٦ چەکداری دیکەش برینداربوون، چەکدارەکانی دیکەش ھەڵھاتن".



ھەروەھا لە بەیاننامەکەدا، ئەوەش خراوەتەڕوو: "شەڕ و پێکدادانەکە ماوەی دوو کاتژمێر بەردەوام بووە و لە ئەنجامیشدا دوو پۆلیس کوژران و پێنجی دیکەش برینداربوون".

bas news-