نوێنەرى تایبەتی ئۆباما لە هاوپەیمانى نێودەوڵەتى دژى داعش ڕایگەیاند، لە ڕێگەى هێزە مەیدانیەکانەوە کە هاوپەیمانى نێودەوڵەتى پاڵپشتیان دەکات %٥٦ ی ناوچەکانى ژێردەسەڵاتى داعش لە عێراق و %٢٧ى ناوچەکانى سوریا کۆنتڕۆڵکراونەتەوە.

برێت مەکگۆرک ئەمڕۆ ٢٩ی تشرینی دووەم لە پەراوێزى کۆبوونەوەى نوێنەرى وڵاتانى هاوپەیمانى نێودەوڵەتى دژى داعش لە واشنتۆن ڕایگەیاند، پانتاییەکى فراوان لە ناوچەکانى عێراق و سوریا کۆنتڕۆڵکراونەتەوە کە لە ساڵى ٢٠١٤ەوە لەلایەن داعشەوە کۆنتڕۆڵکرابوون.

مەکگۆرک ڕاشیگەیاند ژمارەى چەکدارانى داعش بەراورد بە دوو ساڵ و نیوى ڕابردوو بۆ کەمترین ژمارە کەمبووەتەوە و زۆربەى سەرکردە باڵاکانى داعش کوژراون لەوانە بەرپرسى کردەکانى دەرەوە و وەزیرانى جەنگ و دارایى و ڕاگەیاندن.

برێت مەکگۆرک ئاماژەى بەوەشکردوە، پەیوەندیکردنى چەکدارانى بیانى بە ڕیزەکانى داعشەوە بەراورد بە دوو ساڵى ڕابردوو زۆر کەمى کردوە و سوپاى تورکیاش ڕۆڵى گەورەیان بینیوە لە کۆنترۆڵکردنەوەى ناوچە سنوریەکان لەژێر دەستى داعشدا.

ساڵى ٢٠١٤ و لە سەرەتاى هێرشەکانیاندا، چەکدارانى داعش توانیان نزیکەى نیوەى خاکى سوریا و زیاتر لە % ٤٠ى خاکى عێراق کۆنتڕۆڵ بکەن.