هیكۆ ماس، وه‌زیری دادی ئه‌ڵمانیا، ئه‌مڕۆ دووشه‌ممه‌ 26ی ئه‌یلوول/ سیپتێمبه‌ری 2016 رایگه‌یاند، حكوومه‌تی وڵاته‌كه‌ی رێكاری یاسایی له‌ دژی فه‌یسبووك و تۆڕه‌ كۆمه‌ڵایه‌تییه‌كانی دیكه‌ ده‌گرێته‌به‌ر، ئه‌گه‌ر هه‌وڵه‌كانییان بۆ دژایه‌تیكردنی گوتاری توندڕه‌وی چڕنه‌كه‌نه‌وه‌ و بابه‌ته‌ "وهمی و تیرۆرییه‌" ئیسلامییه‌كان له‌سه‌ر تۆڕه‌كه‌ لانه‌دات.

وه‌زیری دادی ئه‌ڵمانیا ئاماژه‌ به‌وه‌ ده‌كات، فه‌یسبووك و تویته‌ر و گووگڵ، بابه‌ته‌ نایاسایی و توندڕه‌وییه‌كان به‌ خێرایی ره‌شده‌كه‌نه‌وه‌، به‌ڵام ده‌بێت له‌و بواره‌دا هه‌وڵی زیاتر بده‌ن و ئه‌وه‌نده‌ به‌س نییه‌.

هیكو ماس راشیگه‌یاند، تۆڕه‌ كۆمه‌ڵایه‌تییه‌كان وه‌ڵامی داوای دامه‌زراوه‌ حكوومییه‌كان ده‌ده‌نه‌وه‌، به‌ڵام سكاڵای دامه‌زراوه‌ تایبه‌ته‌كان پشتگوێده‌خه‌ن و به‌هه‌ند وه‌رییان ناگرن.

ئه‌و وه‌زیره‌ روونیشی كرده‌وه‌، ئه‌و بابه‌تانه‌ی له‌و تۆڕه‌ كۆمه‌ڵایه‌تییانه‌ بڵاوكراونه‌ته‌وه‌ و سكاڵایان له‌سه‌ر تۆماركراوه‌، تویته‌ر 1%، یوتیوب 10% و فه‌یسبووكیش 46%ی ره‌شكردووه‌ته‌وه‌.

وه‌زیری داد ئاماژه‌ به‌وه‌ش ده‌كات، ئه‌وان هه‌نگاوی داهاتوو تاووتوێده‌كه‌ن، به‌تایبه‌ت دوای ته‌واوبوونی توێژینه‌وه‌یه‌كی حكوومه‌تی وڵاته‌كه‌ی، كه‌ مانگی ئادار/ مارسی 2017 ته‌واو ده‌بێت و گرتنه‌به‌ری رێكاری یاساییشی به‌دوور نه‌زانی.

ماس گوتیشی "ئێستا ره‌وشه‌كه‌ باشتره‌، به‌ڵام به‌ گوێره‌ی پێویست نییه‌، بۆیه‌ پێویسته‌ گوشاره‌كان له‌سه‌ر كۆمپانیاكان به‌رده‌وام بن".
k24-