کۆنگرەی نەتەوەکانی ئێران بە بلاوکردنەوەی ئاگادارییەک ئاشکرای کردووە بڕیارە کۆنفرانسی ئەو کۆنگرەیە لە فرانکفۆرتی ئەڵمانیا بەڕێوە ببات.

بەپێی هەمان ئاگاداری ئەو کۆنفرانسە لەژێر ناونیشانی" دۆخی خۆرهەڵاتی ناوەراست، ئێستا و داهاتووی ئێران" ماوەی یەک ڕۆژ دەخایەنێت و لە ڕۆژی شەممە 27.08.2016دا بەڕێوە دەچێت.

کۆنفرانسە لە دوو پانێلی پێش نیوەڕۆ و دوانیوەڕۆ و بە بەشداریی نوێنەرانی حیزب و ڕێکخراوە سیاسییەکانی کوردستانی ڕۆژهەڵات، عەرەب، بەلووچ، ئازەری، تورکەمەن و.. نەتەوە و ئیتنیکەکانی ئێران بەڕێوە دەچێت.

بڕیارە لە کۆنفرانسەکەدا ئەم تەوەرانە بخرێنە بەرباس و باسیان لەبارەوە بکرێت.

- گۆڕانکارییەکانی ناوچە و ڕۆڵی گەلانی بندەست لە ئێرانی داهاتوو.

- دەستتێوەردانی تێکدەرانەی کۆماری ئیسلامی لە ناوچەی خۆرهەڵاتی ناوەڕاست و کاریگەریی لەسەر سەرکوتکردنی گەلانی ئێران.

کۆنگرەی نەوەتەکانی ئێران ڕێکخراوێکی فەرمیی سیاسیی نەتەوەکانی پێکهێنەری ئێرانە و بەتایبەت پارت و ڕێکخراوە دژبەر و ئۆپۆزسیۆنەکانی ئێران دایان مەزراندووە و باوەڕیان بە ڕووخانی کۆماری ئیسلامی و دامەزرانی سیستەمێکی فیدراڵ و دیموکرات لە ئێران هەیە کە هەموو نەتەوە و ئیتنیکەکان تێیدا ڕۆڵ و کاریگەرییان هەبێت.

لە پێکێهێنان و ڕاپەڕاندنی کارەکانی ئەو کۆنگرەیەدا پارتە سیاسییەکانی کوردستانی ڕۆژهەڵات دەوری سەرەکی دەگێڕن.








باسنيوز