بۆمبێكی چێنراو له‌ دووره‌وه‌ به‌كاروانێكی سه‌ربازیی سوپای توركیا له‌ نزیك شارۆچكه‌ی بیسمیل له‌ ئامه‌دی باكووری كوردستان ته‌قیه‌وه.

به‌پێی زانیارییه‌ سه‌ره‌تاییه‌كان، ته‌قینه‌وه‌كه‌ له‌سه‌ر رێگه‌ی سه‌ره‌كیی گوندی كازانجی و حاجی توركمان له‌ شارۆچكه‌ی بیسمیل سه‌ر به‌ شاری ئامه‌د له‌ باكووری كوردستان روویداوه ‌و به‌هۆیه‌وه‌ زریپۆشێكی سه‌ربازیی تێكشكاوه‌ و دوو سه‌ربازیش برینداربوون‌.

لەو شوێنەی تەقینەوەکەی تیایدا روویداوە ده‌نگی ته‌قه‌یه‌كی زۆر هاتووه ‌و هێزه‌كانی جه‌ندرمه‌ش رێگه‌ی سه‌ره‌كییان داخستووە.

سه‌رچاوه‌ ئه‌منییه‌كانی توركیا رایانگه‌یاند، ئۆپه‌راسیۆنێكی چڕ له‌ناوچه‌كه‌دا ده‌ستیپێكردووه‌ و ئه‌مبوڵانسێكی زۆر رووی له‌ شوێنی ته‌قینه‌وه‌كه‌ كردووه‌.