جۆن کێربی گوتەبێژی وەزارەتی دەرەوەی ئەمەریکا لە کۆنفرانسێکی رۆژنامەوانیدا، لەبارەی تۆپبارانکردنی ناوچە سنوریەکانی ھەرێمی کوردستان لەلایەن سوپای ئێرانەوە ڕایگەیاند کە ئەمریکا چاوپۆشی نەکردووە لە ئاستی ھەر کارێک، کە ئێران یان ھەر ھێزێکی دیکە ئەنجامی دابێت.

کێربی ئاماژەی بەوە کرد تا ئێستە ھیچ وردەکارییەکی لەبارەی تۆپبارانکردنی ئێرانەوە پێ نەگەیشتووە و ئەو ھەوالانەشی بە درۆ خستەوە کە ئەمریکا لە بەرانبەر تۆپبارانکردنی ناوچە سنوورییەکانی ھەرێمی کوردستان، لەلایەن سوپای ئێرانەوە بێدەنگی ھەڵبژاردبێت.

ئەم بۆچوونەی کێربی لە کاتێکدا دێت کە دوێنێ حسێن سەلامی جێگری فەرماندەی سوپای پاسداران ھەڕەشەی کردبوو کە ئەگەر ھەر ھێزێک لە ناوچەکە ببێتە مایەی ھەرەشە بۆ سەر ئێران، بێ سێ و دوو وێرانی دەکەن، حکومەتی ھەرێمی کوردستانیش لە بەرامبەردا ھەڵوێستی سەلامی رەت کردەوە و جەختی کردەوە ئەو جۆرە لێدوانانە خزمەتی پەیوەندییەکانی نێوانیان ناکەن.