باڵیۆزی کۆماری چینی میللی لە عێراق رایدەگەیەنێت، کە وڵاتەکەی ساڵانە بە بەهای 20 ملیار دۆلار بازرگانیی لەگەڵ عێراق هەیە و 200 کورسیی خوێندنیش بۆ خوـێندکارانی عێراق تەرخان دەکات.

سەلمان جومەیلی، وەزیری بازرگانیی عێراقی لە بەیاننامەیەکدا رایگەیاندووە، کە رۆژی یەکشەممە 3ـی تەمموزی 2016 لەگەڵ چن وی چینگ، باڵیۆزی چین لەبەغدا کۆبووەتەوە و رایگەیاندووە، عێراق پەیوەندییەکانی لەگەڵ چین پتەوە و ”ئالوگۆڕی بازرگانیمان لە بەرەو پێشچوونە“.

چن وی چینگ لە کۆبوونەوەکەدا رایگەیاندووە، بەهای ئاڵوگۆڕی بازرگانیی وڵاتەکەی لەگەڵ عێراق گەیشتووەتە 20 ملیار دۆلاری ساڵانە و ئەم رێژەیەش مایەی بەرز بوونەوەیە.

باڵیۆزی چین لە عێراق هەروەها رایگەیاندووە، کە وڵاتەکەی دەرگای بە رووی خوێندکارانی عێراقیدا کردووەتەوە بۆ بەدەستهێنانی بڕوانامەی بەرز لە بوارە زانستی، پزیشکی و ئەندازیارییەکان، ”ساڵانە 200 کورسیی خوێندن بۆ خوێندکارانی عێراق تەرخان دەکەین“.

لە مانگی کانوونی یەکەمی 2015، حەیدەر عەبادی، سەرۆک وەزیرانی عێراق لە سەردانێکیدا بۆ چین، پێنج رێککەوتنی ئابووریی، تەکنۆلۆژی، سەربازی، دیپلۆماسیی و نەوت و وزەی لەگەڵ بەرپرسانی باڵای ئەو وڵاتە واژۆ کرد.















باسنيوز