توركیا و ئه‌مریكا ڕێككه‌وتن له‌سه‌ر ئه‌وه‌ی سه‌كۆی موشه‌كی له‌سه‌ر سنوره‌كانی توركیا و سوریا جێگیربكه‌ن. ئه‌و ڕێككه‌وتنه‌ش له‌سه‌ره‌تای مانگی ئایاری داهاتووه‌وه‌ ده‌كه‌وێته‌ بواری جێبه‌جێكردنه‌وه‌. ئه‌وه‌ش بۆ به‌ره‌نگاربوونه‌وه‌ی ئه‌و بۆردوومانانه‌یه‌ كه‌ ده‌كرێنه‌ سه‌رخاكی توركیا.

"مه‌ولود جاویش ئۆغڵۆ" وه‌زیری ده‌ره‌وه‌ی توركیا له‌لێدوانێكدا بۆ ڕۆژنامه‌ی "خه‌به‌ر تورك" ڕایگه‌یاند: " ڕێككه‌وتووین له‌سه‌ر جێگیركردنی سیسته‌می موشه‌كی هایمارس كه‌ سیسته‌مێكی ئه‌مریكی دژه‌ موشه‌كه‌ له‌سه‌ر سنوره‌كان".

ئۆغڵۆ گوتیشی: " ئامانج له‌دانانی ئه‌و سیسته‌مه‌ ئه‌وه‌یه‌ به‌شێوه‌یه‌كی باشتر له‌داعش بده‌ین".

له‌ماوه‌ی ڕابردوودا نزیكه‌ی 40 تۆپ له‌ناو خاكی توركیادا كه‌وتوون كه‌له‌ سوریاوه‌ ئاراسته‌ كراون. له‌كۆی گشتیدا 17 هاووڵاتی توركیا به‌هۆی بۆردوومانه‌كانه‌وه‌ كوژراون.

به‌گوێره‌ی زانیارییه‌كان موشه‌كه‌كانی ئه‌و سیسته‌مه‌ به‌وه‌ ناسراون كه‌ ئاسان ده‌گوێزرێنه‌وه‌ و ده‌شگه‌نه‌ 90 كیلۆمه‌تر.