حکوومەتی تورکیا دوو کەمپی نوێ بۆ ئەو پەنابەرانە دروست بکا، کە لە ئەوروپاوە دەگەڕێنرێنەوە.



بەپێی رێککەوتنێکی حکوومەتی تورکیا و یەکێتیی ئەوروپا، هەر پەنابەرێک لە رێی تورکیاوە لە دوای 20ـی ئاداری 2016 بچێتە ئەوروپا، ئەوا دەنێردرێتەوە تورکیا.



بەپێی زانیارییەکان، کەمپەکان لە ناوچەی (شیشما) لە پارێزگای ئیزمیر دروست دەکرێن و "محیەدین داڵغیچ"، سەرۆک شارەوانی ناوچەکەش رایگەیاندووە، کە دەستیان بە دروستکردنیان کردووە و لەوێوەش پەنجەمۆری پەنابەرەکان وەردەگیرێ.



بڕیارە رۆژی دووشەممە 4ـی نیسانی 2016، 500 پەنابەری وڵاتانی (سوریا، ئەفغانستان و پاکستان)، کە حکوومەتی یۆنان لە دوورگەکانی (لیسبۆس و خیۆس) کۆکردوونەتەوە، بە بەلەم بنێردرێنەوە تورکیا.



بەهۆی شەڕ و قەیرانەکانی وڵاتانی باکووری ئەفریقیا و رۆژهەڵاتی ناوەڕاست بە تایبەت وڵاتانی (لیبیا، سوریا، عێراق و ئەفغانستان)، سەدان هەزار هاووڵاتی ناچاربوونە ماڵ و حاڵی خۆیان بەجێبهێڵن و رووبکەنە وڵاتانی رۆژئاوای ئەوروپا.







باسنیوز