نوێنه‌ری تایبه‌تیی نه‌ته‌وه‌ یه‌كگرتووه‌كان له‌ سووریا ستێفان دیمستۆرا له‌میانه‌ی چه‌ند دیدارێكی له‌ سعوودیه‌ چاوی كه‌وت به‌ وه‌زیری ده‌ره‌وه‌ی ئه‌و وڵاته‌ عادل جوبه‌یر.

به‌پێی راگه‌یه‌نراوێكی نه‌ته‌وه‌ یه‌كگرتووه‌كان نوێنه‌رانی ئۆپۆزیسیۆنی سووریاش به‌شدارییان له‌ دیداره‌كه‌دا كردووه‌.

دوای دیداره‌كه‌ میستورا له‌باره‌ی مه‌ترسیی گرژیی نێوان ئێران و سعوودیه‌ وه‌ك هه‌ڕه‌شه‌یه‌ك بۆ سه‌ر رێكه‌وتنه‌كانی جنێڤ و ڤیه‌ننا گوتی: سعوودیه‌ پێداگره‌ له‌سه‌ر ئه‌وه‌ی گرژییه‌كانی نێوان ئه‌وان و ئێران كاریگه‌ریی خراپ ناكاته‌ سه‌ر ئه‌و رێكه‌وتنانه‌ی له‌ جنێڤ و ڤیه‌ننادا هه‌نگاویان بۆ نراوه‌ و ئێمه‌یش هیوا بۆ ئه‌مه‌ ده‌خوازین.

نوێنه‌ره‌ تایبه‌ته‌كه‌ی نه‌ته‌وه‌ یه‌كگرتووه‌كان هه‌روه‌ها رایگه‌یاند كه‌ دوای دیداره‌كانی سعوودیه‌ سه‌ردانی وڵاتی ئێرانیش ده‌كات و بابه‌تی هه‌نگاوی داهاتووی چاره‌سه‌ری سووریایان له‌گه‌ڵدا تاوتوێ ده‌كات.

ئه‌وه‌ له‌كاتێكدایه‌ كه‌ ئێران و سعوودیه‌ به‌هۆی له‌سێداره‌درانی كه‌سایه‌تی شیعه‌ی سعوودی ئایه‌توڵا نه‌مر و هاوڕێكانییه‌وه‌ گرژیی كه‌وتۆته‌ نێوانیان.