سەرۆکوەزیرانی فەرەنسا رایدەگەیێنێت، 160 هەزار كۆچبەر داواکاری مافی مانەوەیان پێشکەش بە حکومەتی وڵاتەكەی کردووە، هاوکات فەرەنساش لەچوارچێوەی دابەشکردنی كۆچبەران بەسەر وڵاتانی ئەوروپادا، تەنها 30 هەزار كەس وەردەگرێت.

مانوێل فالس، سەرۆکوەزیرانی فەرەنسا لە لێدوانێکی رۆژنامەڤانیدا رایگەیاند " لەچوارچێوەی بڕیاری کۆمیسیاری یەکێتیی ئەوروپا بۆ دابەشکردنی كۆچبەران بەسەر وڵاتانی ئەوروپادا، فەرەنسا 30 هەزار كەس وەردەگرێت، هاوکات حکومەتی فەرەنسا رێز لەمافی پەنابەران دەگرێت و هاوکاری دارایی و مرۆیی پەنابەرانیش دەکات".

سەرۆکوەزیارنی فەرەنسا هەروەها گوتی " حکومەتی فەرەنسا لەڕێگەی تیمێکی وەزارەتەکانی ناوخۆ و دەرەوە و کۆچبەران، دۆسیەی كۆچبەرەكان تاوتوێدەکات و مافی مانەوەش بەو كەسانە دەدات کە لە وڵاتانی شەڕەوە هاتوون و باری ئەمنییان ناجێگیرە، ئەوانەشی شوێنی هاتنیان شەڕی تێدا نییە، دۆسیەکانیان دوادەخرێ".

مانوێل فالس ئاماژەی بەوەش کرد، كە ئێستا نزیکەی 160 هەزار كۆچبەر گەیشتوونەتە فەرەنسا و داواکاری مافی مانەوەیان پێشکەش بە حکومەتی پاریس کردووە، لەو چوارچێوەیەدا فەرەنسا تەنها 30 هەزار كەس وەردەگرێت، هاوکاری داراییان دەكات و کاریشیان پێدەدات.





رووداو-