وەزیری بەرگریی ئەمەریكا لە نووسینێكدا كەلە رۆژنامەی “یو ئەی ئێس تودەی” بڵاو كراوەتەوە، سەرەڕای ئەوەی بەرگری لە رێككەوتنی ناوكی لەگەڵ ئێران كردووە، نووسیویە: “ئەم رێككەوتنە دەبێتە هۆی ئەوەی هەرچەشنە رێكارێكی سەربازی لەدژی تاران كاریگەرتر بێت.”

بەپێی راپۆرتی ئاژانسی هەواڵدەریی فەرەنسا ئەشتۆن كارتەر جەختی كردووەتەوە رێككەوتنی ئەتۆمی لەگەڵ ئێران بەرەنجامی كاریگەری بەدواوە دەبێت.

هاوكات باسی لەوەش كردووە: “رێكاری سەربازی لەدژی ئێران هێشتا لەبەردەستە و ئەگەر بێت و هەست بە زەروورەت و پێویستیی ئەم رێكارە بكەین، لەژێر كاریگەریی رێككەوتنەكەدا جێبەجێی دەكەین.”

ئێران و شەش زلهێزی جیهانی 13ی مانگی تەمووز پاش زیاتر لە 10 ساڵ مشتومڕی ئاڵۆز لە ڤیەنا لەبارەی پرسی ناوكیی ئێران گەیشتنە رێككەوتن و بەپێی ئەو رێككەوتنە هاوبەشە كە بە “بەرجام” ناسراوە، بەرنامەی ناوكیی ئێران بەرتەسك دەكرێنەوە و لە بەرانبەریشدا گەمارووە ئابوورییەكانی سەر ئێران هەڵدەگیرێن.

بەڵام هەتا ئێستە لە ناوخۆی ئێران و ئەمەریكا لەسەر ئەم پرسە بڕیاری یەكلاكەرەوە نەدراوە.

بڕیارە 12 رۆژی دیكەی كۆنگرێسی ئەمەریكا پرسی رێككەوتنی ئەتۆمیی ئێران تاوتوێ‌ بكات، بەڵام كۆماریخوازەكان كە زۆرینەی كۆنگەریان بەدەستە، دژی ئەم رێككەوتنەن.

















باسنیوز