لەگەڵ بەرفراوانبوونی شەپۆلی پەنابەران بەرەو ئەوروپا، ئەڵمانیا هەوڵەکانی خۆی دژی بازرگانانی مرۆڤ چڕتر دەکاتەوە، بەتایبەتی دوای ئەوەی هەفتەی رابردوو لە وڵاتی نەمسا 71 پەنابەر لە کامیۆنێکدا بە مردوویی دۆزرانەوە.
وەکو ئەوەی پۆلیسی فیدراڵی ئەو وڵاتە ئاشکرایکردووە، لە سەرەتای ئەمساڵەوە تاوەکو کۆتایی مانگی تەمموزی 2015 ، لە سەرانسەری ئەڵمانیادا بەتۆمەتی ئەوەی قاچاخی بە مرۆڤ دەکەن، هەزار و 780 کەس دەستگیرکراون. هەروەها ساڵی 2014 ەش 2 هەزار و 149 کەس بەتۆمەتی قاچاخچێتیکردن بە مرۆڤ دەستگیرکراون.
گرووپی یەکەمی گیراوەکان کە ژمارەیان 227 کەسە، بە تۆمەتباری سەرەکی هەژماردەکرێن و هەنگارین. دووەمین گرووپی تۆمەتباران هی وڵاتی رۆمانیا(یۆنان)نن کە ژمارەیان 147 کەسە. دوای ئەوان:110 کەسی سیبیری، 108 کەسی سووری و 101 کەسی بولغاری بەتۆمەتی قاچاخچێتی دەستگیرکراون.
پۆلیسی فیدراڵی ئەڵمانیا ئاشکرایکرد کە سبەی سێشەممە لە شاری پاساوی باشووری ئەڵمانیا، ناوەندێکی تایبەت لەدژی قاچاخچییەکان دەستبەکاردەبێت و، لەوێوە زانیارییەکان دەربارەی قاچاخچی و تۆڕەکانیان کۆدەکرێتەوە. جگە لە پسپۆڕانی ئەڵمانی، نوێنەرێکی نەمسا لەنێو ناوەندەکەی ئەڵمانیادا کاردەکات.