لێژنه‌ی باڵای هه‌ڵبژاردنه‌كان له‌ میسر رایگه‌یاند كه‌ هه‌ڵبژاردنه‌كانی ئه‌نجومه‌نی نوێنه‌ران كه‌ ماوه‌یه‌كه‌ چاوه‌ڕوان ده‌كرێت ئه‌نجام بدرێت ، به‌ دوو قۆناغ له‌ مانگه‌كانی تشرینی یه‌كه‌م و تشرینی دووه‌می داهاتوو ئه‌نجام ده‌درێت ئه‌مه‌ش دوایین نه‌خشه‌ رێگایه‌ به‌ره‌و دیموكراسیه‌ت كه‌ سوپای میسر رایگه‌یاند دوای لادانی محه‌مه‌د مورسی سه‌رۆكی پێشووی میسر له‌ ساڵی دووهه‌زارو سێزده‌ .

دادوه‌ر ئه‌یمه‌ن عه‌باس سه‌رۆكی لێژنه‌كه‌ روونیكرده‌وه‌ كه‌ قۆناغی یه‌كه‌م بۆ هاووڵاتیانی میسر له‌ ده‌ره‌وه‌ی وڵات له‌ حه‌ڤده‌و هه‌ژده‌ی تشرینی یه‌كه‌م و له‌ ناو میسریش له‌ هه‌ژده‌و نۆزده‌ی هه‌مان مانگ ئه‌نجام ده‌درێت . قۆناغی دووه‌میش بۆ ده‌ره‌وه‌ی وڵات له‌ بیست و یه‌ك و بیست و دووی تشرینی دووه‌م و بۆ ناوه‌خۆش له‌ بیست و دوو و بیست و سێی هه‌مان مانگ ئه‌نجام ده‌درێت .

شایانی باسه‌ له‌ مانگی حوزه‌یرانی ساڵی دووهه‌زارو دوازده‌ میسر بێ په‌رله‌مانه‌ كاتێك دادگای باڵای ده‌ستووری ئه‌نجومه‌نی گه‌لی هه‌ڵوه‌شانده‌وه‌ كه‌ زۆرینه‌ی ئه‌و ئه‌نجومه‌نه‌ ئه‌ندامانی گروپی ئیخوان موسلمین بوون .

سه‌رۆكی لێژنه‌ی باڵای هه‌لبژاردنه‌كان راشیگه‌یاند كه‌ ده‌رگای خۆپاڵاوتن رۆژی سێشه‌ممه‌ ده‌ستپێده‌كات و ماوه‌ی دوازده‌ رۆژ ده‌خایه‌نێت.