24ی‌ ته‌مموز/ یۆلیۆ (گوڵان میدیا)- رۆژی سێ شەممە سەندیكای رۆژنامەنووسانی توركیا راپۆرتی خۆی سەبارەت بە رووداوەكانی پاركی گەزی و مەیدانی تەقسیمی شاری ئەستەنبۆڵ پێشكەشی رای گشتی كرد و رایگەیاند كە بە هۆی ئەم رووداوانەوە ژمارەیەكی یەكجار زۆر رۆژنامەنووس رووبەرووی زڵم بوونەتەوە.

لەم بارەیەوە رۆژنامەی میللیەتی توركی بڵاوی كردووەتەوە سەندیكای رۆژنامەنووسانی توركیا رایگەیاندووە كە لە رۆژی دەستپێكردنی رووداوەكانی پاركی گەزییەوە تا رۆژی كۆتایی هاتنی ئەو رووداوانە بە لانی كەمەوە 21 رۆژنامەنووس لە كار دەركران و 37 رۆژنامەنووسی دیكە ناچار كران ئیستیقالە بدەن و 14 رۆژنامەنووسی دیكەیش بە زۆر ناچار كراون مۆڵەتی زۆری وەربگرن و ئەمەیش بە مانای دەركردنی ئەم رۆژنامەنووسانە لە كارە.

سەندیكای رۆژنامەنووسانی توركیا جەختی لە سەر ئەوە كردووەتەوە كە رۆژ لە دوای رۆژی ژمارەی ئەو رۆژنامەنووسانە كە بە هۆی بەشداری كردنیان لە خۆپێشاندانەكان یا خۆ بە هۆی پشتگیری كردنی خۆپێشاندانەكان لە كار دوور دەخرێنەوە زۆرتر دەبێت.