Li navçeya Elcewazê ser bi parêzgeha Bedlîsê ya Bakurê Kurdistanê, gûzên tên berhemanîn ji ber daxwaza zêde ne bi kîlo lê bi liban (edet) tên firotin.

Li parêzgeha Bedlîsê salane 5 hezar ton gûz tên berhemanîn û gwîzên navçeya Elcewazê bi mezinbûn û tenikbûna qalikê xwe û bi rêjeya dohn û tama xwe gelekî cuda ne. Li Bakurê Kurdistanê û Tirkiyê daxwazeke zêde li ser gûzên Elcewazê heye û ji ber wê jî bi liban tên firotin.

Wêne: AA
Rêveberê Çandinî û Daristanê yê Bedlîsê Rifat Çelik got: “Li Bedlîsê 45 hezar dekar baxên gûzan hene. 500 hezar darên me yên berhem didin hene. Îsal nêzîkê milyonek û 500 hezar dolar dahata gûzan hebû. Li bajarê me 35 curên gûzan hene. Herwiha li Elcewazê salane 400 hezar şitlên gûzan tên berhemanîn.”

Wêne: AA
Gwîz ji bo aboriya Elcewazê û Bedlîsê cihekî girîng digire û bi sedan malbat debara xwe bi berhemanîna gûzan dikin.

Esnafê bi navê Muhammed Ustun jî dibêje: “Gûzên Elcewazê di asta cîhanî de di rêza yekem de cih digrin. Daxwazeke zêde li ser heye. Firotina bi liban jî kevneşopiyeke ji bav û kalên me maye. Hezar lib gûzên Elcewazê di navbera 12-15 kîlo tên.”

Wêne: AA
Xelkê Elcewazê jî gelek caran gûzan dikirin û ji mirovên xwe yên li bajarên Stenbol, Enqere û Bursayê re dişînin. Kîloya gwîzên Elcewazê di navbera 5-6 dolaran de tê firotin.

 

Rudaw