جیهان ئەڤرۆ نە ب پێنگاڤێن ئاسایی یێن وەکى دەیان ساڵێن چوین دچیت، بەلکو ب لەزاتیەکا سەرسوڕهێنەر بەرەف سەردەمەکێ نوی بازددەت، کو دبیت د چەند ساڵێن کێم دا دیمەنێن ژیانا مرۆڤایەتیێ ب تەمامی بهێنە گوهرین.

ئەڤرۆ ئەم د قوناغەکا ڤەگۆهێزا مێژوویی دا دژین؛ د ناڤبەرا جیهانا کەڤن کو تێدا مرۆڤی کۆنترۆلا ئامیران دکر، و جیهانا بهێت کو تێدا دێ ئامیر بیتە هەڤپشکێ عەقڵ، بڕیار و ژیانا مە یا ڕۆژانە.

د پێنج ساڵێن بهێت دا، تەکنۆلۆجیا دێ ژ چوارچۆڤێ کەرەستە یێن ئاسانکاری یان کەیف و خۆشیێ دەرکەڤیت، و دێ بیتە هێزەک کو دابەشکرنەکا نوی دەتە ئابووری، سیاسەت، پەروەردە، ساخلەمی و تەنانەت پەیوەندی یێن مرۆڤایەتیێ ژی.

ژیریا دەستکرد (AI) ئێدی نە پرۆژەیەکێ پاشەڕۆژێ یە، بەلکو ڕاستیەکا بەرفرەهە و رۆژ بۆ رۆژێ گەشێ دکەت، و دێ د نێزیک دا ب ئاوایەکێ وەها چیتە د ناڤ هووربینیا ژیانا مە دا، کو چ جاران کەسی خەیال نەکربیت.

تێ پێشبینیکردن کو ڕۆبۆتێن مالان ب شێوەیەکێ بەرفرەهـ بەڵاڤ ببن، نە وەکى ئامیرێن بێ گیان، بەلکو وەک هاریکارێن ڕاستەقینە د ناڤ مالان دا؛ کارێن پاقژکرنێ، چێکرنا خوارنێ و ڕێکخستنا کاروبارێن ڕۆژانە بکەن، و بەرهەڤ بن بۆ چاڤدێریکرنا دانعەمر و زارۆکان، هەروەسا سیستەمێن ژیر دێ پتر ل مرۆڤی گەهن، و دێ دەنگ، هەست و پێتڤیاتیێن وی ب هوستاییەکا بلند شلوڤەکەن.

ل دۆر بوارێ پزیشکی، دێ شۆڕشەکا مەزن روی دەت کو دێ مرۆڤایەتیێ بەتە قوناغەکا نوی یا خۆپاراستن و چارەسەریێ، ئامیرێن بچووک د ناڤ مالان دا، دێ شیان هەبن چاڤدێریا ساخلەمییا مرۆڤی ب شێوێ ڕۆژانە بکەن، لێدانا دلی، پشکنینا خوینێ، شەکرێ و بێهنکێشانێ دیار بکەن، و بەری نیشانێن نەخۆشیێ دەرکەڤن، نەخۆشیێ ئاشکرا بکەن.

هەر وەها پەلێن دەستکرد یێن ب مێشکی ڤە گرێدای دێ پتر پێشکەڤن، ب شێوەیەکی کو دێ شیانێن لڤینا سروشتی دەنە مرۆڤی و بەشکم شیانێن وان ژ گێولێ جەستەیێ نەریتی ژی ببوورن.

د جیهانا ڤەگوهاستنێ دا، ترومبێلێن بێ شوفێر دێ خۆ ل سەر باژێرێن مەزن سەپیینن، و ترومبێل دێ ژ ئامرازەکێ لێخورینێ یێ ماندیڤەکەر گوهڕیت بۆ ئارامکرنێ. دویر نینە د چەند ساڵێن کێم دا، ئەم دیدەڤانێن دەستپێکرنا بکارئینانا فرۆکە یێن تاکەکەسی (فڕینۆکێن بچووک) بین بۆ هاتنوچوونێ د ناڤ باژێرێن قەرەبالغ دا.

مۆبایل و ئامیرێن ژیر ژی دێ چنە د قوناغەکا تەمام جودا دا، ئەڤ شاشە یێن کلاسیک دێ هێدی هێدی بەرزە بن و تەکنۆلۆجیا (هۆلۆگرام) و چاڤیلکێن ژیر دێ جهێ وان گرن، د هەمان دەم دا دێ ئینتەرنێتا ئەسمانی (Satellites) گەهیتە ده‌ڤه‌رێن چیایی و یێن هەرە دویرەدەست.

ل سەر ئاستێ ئابووری، باژێرێن ژیر و کێڵگە یێن ستوینی (مەزرەعێن عمودی) دێ بەرفرەهـ بن، و تێگەهێ کارێ نەریتی دێ دگەل گەشەکرنا ئابوورا دیجیتاڵی و کارکرنا ژ دوور ڤە (Online) هێتە گوهرین.

جیهانا بهێت دێ پتر گرێدای ب هەڤ دو ڤە بیت، لێ د هەمان دەم دا دێ پتر یا پڕی هەڤڕکی و ئالۆزی بیت.
لێ ئەڤ پاشەڕۆژە، سەرەڕای برۆسکا خۆ، بێ مەترسی نابیت، پێشکەفتنا ب لەز دێ کێشە یێن ڕەوشتی و جڤاکی یێن مەزن دروست کەت، یێن گرێدای ب تایبەتمەندییا مرۆڤی (الخصوصية)، هەژمون و دەستەڵاتا مەزنە کۆمپانی یێن تەکنۆلۆجی، پاشەڕۆژا دەلیڤە یێن کاری، و مەزنبوونا جوداهییا د ناڤبەرا وەلاتێن دەوڵەمەند و هەژار دا بەرهەم ئینیت.

مرۆڤایەتی ئەڤرۆ ل بەرامبەر ژ دایکبوونا سەردەمەکێ نوی یە، کو دێ بیتە کاریگەرترین سەردەم ل پاش شۆڕشا پیشەسازی، و پاشەڕۆژ ل هێڤییا کەسێن دودل و دلەڕاوکێ و ڕاڕا نامینیت، لێ دێ بیتە پشکا وان جڤاکێن کو دشێن ل ڤان گوهڕینان بگەهن و خۆ ب زانست و داهێنانێ بۆ بەرهەڤ بکەن.