لە كۆلێژەكانی پزیشكیدا قوتابیان پێش ئەوەی دەست بۆ جەستەی مرۆڤ ببەن، نەشتەرگەری بۆ میوەكان بە گشتی و بۆ مۆز بەتایبەتی دەكەن، ئەمە تەنیا كاتبەسەربردن نییە، بەڵكو وانەیەكی زۆر گرنگی زانستی بایۆلۆجییە. خوێندكاران لە ڕێگەی مۆزەوە سەرەتاكانی دوورینەوەی برین (Suturing) فێر دەبن. ئەمە یارمەتییان دەدات كە چۆن بە وردی دەست بە ئامێرە پزیشكییەكانەوە بگرن و بە بێ مەترسی بۆ سەر ژیانی هیچ كەسێك، متمانە بە خۆیان پەیدا بكەن. لە ڕووی زانستی بایۆلۆجییەوە، توێكڵی مۆز چەند تایبەتمەندییەكی هەیە كە زۆر لە پێستی مرۆڤەوە نزیكە. توێكڵی مۆز نەرمی و ئەستوورییەكی وای هەیە كە زۆر لە پێستی مرۆڤ دەچێت، كاتێك خوێندكارەكە دەرزییەكەی تێدەكێشێت، هەمان هەستی پێستی مرۆڤی پێ دەبەخشێت. چینەكانی توێكڵ: توێكڵی مۆز لە چەند چینێكی جیاواز پێك هاتووە، ئەمەش وا دەكات خوێندكارەكە فێر بێت چۆن تەنیا چینە سەرەكییەكان بدوورێتەوە و زیان بە قووڵایی (ناوەوەی مۆزەكە) نەگەیەنێت. ئەم هەنگاوە بچووكە لە مەشقكردندا، دەبێتە هۆی ڕزگاركردنی ژیانی هەزاران نەخۆش لە داهاتوودا.