هونەرمەند دەز دەنیز بۆ گوڵان:هونەر دەتوانێت هەر چوار پارچەی كوردستان لە یەكدی نزیك بكاتەوە
دەز دەنیز هونەرمەند و گۆرانیبێژێكی ناسراوی كوردە وەك یەكێك لە یەكەم و دیارترین كچانی كورد دەناسرێت كە بە زمانی كوردی گۆرانی ڕاپی وتووە، و توانیویەتی لەم بوارەدا كە زیاتر پیاوان تێیدا زاڵن، جێگەی خۆی بكاتەوە.
بڕوایەكی قووڵی بەوە هەیە كە هونەر ئامرازێكی بەهێزە بۆ یەكخستنی هەر چوار پارچەی كوردستان و پاراستنی زمانی دایك. بەردەوام لە فیستیڤاڵە كوردییەكان و چالاكییە نەتەوەییەكاندا بەشدارە و كلیپ و بەرهەمەكانی لە تۆڕە كۆمەڵایەتییەكاندا بینەرێكی باشیان هەیە.
دەز دەنیز تەنیا گۆرانیبێژێك نییە، بەڵكو چالاكوانێكی بواری مافی ئافرەتان و نەتەوەییە كە مۆسیقای ڕاپ وەك چەكێك بۆ دەربڕینی داواكارییەكانی كورد و ئافرەتان بەكار دەهێنێت. جگە لە مانە لە بواری شێوەكارییشدا كار و چالاكیی هونەریی زۆری هەبووە، كە بە هەمان شێوە گوزارشت لە مافەكانی ئافرەتان دەكات.
*ڕۆڵی هونەرمەندانی كورد لە پاراستن و پێشخستنی زمان و كولتووری كوردیدا چییە؟
-هونەرمەندانی كورد ڕۆڵێكی گرنگیان هەیە بۆ زیندوو ڕاگرتنی زمانی كوردی. كاتێك زمان لە ژیانی ڕۆژانەدا بەكار دێت، بە زیندوویی دەمێنێتەوە، لە ڕێگەی مۆسیقا، شیعر و شانۆوە، زمان لە نەوەكانی پێشوووە بۆ نەوەی نوێ دەگوازرێتەوە و لە هەمان كاتدا بە شێوازێكی مۆدێرن نوێ دەكرێتەوە، ئەمەش دەبێتە هۆی گەشەكردنی كولتوور.
*گۆرانی، شیعر و شانۆ چۆن دەتوانن هەستی ناسنامە و سەربەرزیی نەتەوەیی لەناو گەنجاندا دروست بكەن؟
-هونەر ڕاستەوخۆ كاریگەری لەسەر هەستی مرۆڤەكان هەیە، كاتێك گەنجان خۆیان لە گۆرانییەك یان چیرۆكێكدا دەبیننەوە، هەستی وابەستەیی و ناسنامەیان بۆ دروست دەبێت. ئەم شێوازە لە تێگەیشتن لە تیۆری بەهێزترە، چونكە پشت بە هەست و ئەزموون دەبەستێت.
*كاریگەریی هونەرمەندانی ئافرەت لە بەهێزكردنی متمانە بەخۆبوونی كچان و گەنجانی كورددا چییە؟
-ئافرەتانی هونەرمەندانی دەبنە نموونەی زیندوو بۆ كچان، ئەوان نیشانی دەدەن كە ئافرەتان دەتوانن لە هەموو بوارەكاندا سەركەوتوو بن، ئەمەش متمانە بەخۆبوون زیاد دەكات، هەروەها بۆ كوڕانیش ئەم شتە ئاسایی دەبێتەوە كە ئافرەتان خاوەن هێز و توانان.
*ئافرەتان هونەرمەندان وەك نموونەی سەركەوتن چۆن دەتوانن هەستی نەتەوەیی بەرز بكەنەوە؟
-كاتێ هونەرمەندێكی ئافرەت سەركەوتوو دەبێت و ناسنامەی خۆی دەپارێزێت، دەبێتە نموونەیەك بۆ گەنجان و نیشانی دەدات كە سەركەوتن تەنیا كەسی (شەخسی) نییە، بەڵكو لە هەمان كاتدا پەیوەندی بە گەل و ناسنامەوە هەیە، ئەمەش هەستی بەرپرسیارێتی زیاد دەكات.
*ڕۆڵی میدیا و تۆڕە كۆمەڵایەتییەكان لە گەیاندنی پەیامی هونەرمەنداندا چییە؟
-میدیا و تۆڕە كۆمەڵایەتییەكان هەلومەرجێكی نوێیان خوڵقاندووە كە هونەرمەند ڕاستەوخۆ لەگەڵ خەڵكدا پەیوەندیی هەبێت، بەتایبەت بۆ گەنجان، ئەم پلاتفۆرمانە زۆر گرنگن. ئەگەر بە شێوەیەكی ڕاست بەكار بهێنرێن، دەتوانن زمان و كولتوور بە ژمارەیەكی زۆرتر لە خەڵك بگەیەنن.
*چۆن دەكرێت لە ڕێگەی هونەرەوە هەستی یەكڕیزیی نەتەوەیی لەناو گەنجاندا بەهێز بكرێت؟
-هونەر دەتوانێت هەر چوار پارچەی كوردستان لە یەكدی نزیك بكاتەوە، كاتێك هونەرمەند بیر لە بارودۆخ و مەرجەكانی كوردستان دەكاتەوە و بە شێوەیەكی هەستیارانە و ڕاستەوخۆ پەیامەكانی دەگەیەنێتە گەل، دەتوانێت شێواز و دەنگە جیاوازەكان كۆ بكاتەوە، بەم شێوەیە گەلیش خۆی لە چوارچێوەیەكی هاوبەشدا دەبینێتەوە و ئەمەش هەستی یەكڕیزی بەهێز دەكات. ئێمە وەك ئافرەتانی هونەرمەندای كورد كە لە هەر چوار پارچەكەوە هاتووین و لە تاراوگە (دیازپۆرا) دەژین، بۆ ئەم مەبەستە گۆرانییەكمان ئامادە كردووە، ئێستا لە قۆناغی وێنەگرتنی كلیپەكەداین، ئامانجمان ئەوەیە یەكڕیزی و یەكێتی لە ناو گەلی كورددا بەهێز بكەین و بیكەینە شتێكی بەردەوام.
*هونەرمەندانی كورد، بەتایبەت ئافرەتان، چۆن دەتوانن مێژووی تێكۆشان بگەیەننە نەوەی نوێ؟
-لێرەدا ڕۆڵی بەرهەمی هونەرمەند و ئەو پەیامەی دەیدات زۆر گرنگە، بەڵام بۆ ئەوەی ئەم پەیامە بگاتە نەوەی نوێ، ڕۆڵی میدیای دیجیتاڵ و میدیای گشتی هێشتا زیاترە.
كاتێك هونەرمەند دەتوانێت هونەرەكەی لە شوێنەكانی وەك فێستیڤاڵ، كۆنسێرت، تەلەفزیۆن و تۆڕە كۆمەڵایەتییەكان پێشكەش بكات، گەیاندنی پەیامەكە ئاسانتر و فراوانتر دەبێت. هەروەها ئینفلۆنسەر و پلاتفۆرمەكانی وەك یوتیوب و میدیا دیجیتاڵییەكان، هاوكارن بۆ ئەوەی هونەرمەند كار و پەیامەكەی بە كەسانی زۆرتر بگەیەنێت، لەم پرۆسەیەدا تەنیا هونەرمەند نا، بەڵكو دامەزراوە هونەری و كولتوورییەكان وخەڵكیش ڕۆڵی گرنگیان هەیە. بڵاوكردنەوە و ناساندنی بەرهەمە هونەرییەكان لەلایەن هەموو ئەم لایەنانەوە، وا دەكات پەیامەكە بە شێوەیەكی بەرفراوان بڵاو ببێتەوە و كاریگەرییەكەی زیاد بكات.
*ڕۆڵی فێستیڤاڵ و چالاكییە كولتوورییەكان چین؟
-فێستیڤاڵ و چالاكییەكان لە هەمان كاتدا شوێنی كۆبوونەوەن كە كولتوور و هونەر و هەستی ناسنامە و وابەستەیی بەهێزدەكەن.
*سینەما و دراما چۆن دەتوانن ناسنامەی نەتەوەیی نیشان بدەن؟
-سینەما و دراما بەشێوەیەكی بینراو ژیانی مرۆڤەكان نیشان دەدەن، ئەمەش یارمەتیدەر دەبێت كە مرۆڤەكان بە ئاسانی خۆیان لەناو ئەو چیرۆكانەدا ببیننەوە و لە ناسنامەی خۆیان تێبگەن.
*بوونی ژنانی سەركەوتوو چۆن كاریگەرییەكی درێژخایەن لەسەر گەنجان دروست دەكات؟
-ئەم شتە لە مەودای دووردا بیر و ڕای كۆمەڵگە دەگۆڕێت. ژنانی سەركەوتوو دەبنە نموونە و وا دەكەن ڕۆڵی ژن لە كۆمەڵگەدا ئاسایی بێت، ئەمەش دەبێتە هۆی دروستبوونی كۆمەڵگەیەكی یەكسانتر و هاوسەنگتر.
