پۆلیسی ئەمریکا هەواڵی تەقەکردنی لە شاری سالت لیک سیتی لە ویلایەتی یوتای بڵاوکردەوە و ڕایگەیاند، لە ڕووداوەکەدا لانیکەم هەشت کەس کوژراون و برینداربوون.

پۆلیسی شاری سالت لیک سیتی لە ویلایەتی یوتا لە ئەمریکا ڕایگەیاند، شەوی چوارشەممە ٧ی ١ لە تەقەکردنێکدا دوو کەس کوژراون و شەش کەسی دیکەش برینداربوون.

هەروەها پۆلیس ڕایگەیاندووە، تەقەکردنەکە لە دەرەوەی پرسەیەک ڕوویداوە.

بەپێی زانیارییەکانی پۆلیس، تا ئێستا هیچ تۆمەتبارێک دەستگیر نەکراوە و ئۆپەراسیۆنێک بۆ دەستگیرکردنی ئەنجامدەرانی تەقەکردنەکە بەردەوامە.

پۆلیس ئاماژەی بەوەشکردووە، لە کاتی تەقەکردنەکەدا پرسەیەک لە کەنیسە بەڕێوەدەچووە.

لە بریندارەکان باری تەندروستی سێ کەسیان ناجێگیرە و باری تەندروستی سێ کەسی دیکە نادیارە.

ئەمەش لە کاتێکدایە کە ویلایەتە جۆراوجۆرەکانی ئەمریکا لە ماوەی یەک ساڵی ڕابردوودا چەندین ڕوویداوی هاوشێوەیان بەخۆوە بینیوە.

 

 

 

گوڵان: سەردار خەلیل