وەزیری دەرەوەی چین، وانگ یی، دوای دەستگیرکردنی نیکۆلاس مادۆرۆ لەلایەن ئەمریکاوە، ڕایگەیاند، پەکین ناتوانێت هیچ وڵاتێک قبوڵ بکات کە خۆی بە "دادوەری جیهان" بزانێت.

ڕۆیتەرز ڕۆژی دووشەممە 5  /  1/2026، لە ڕاپۆرتێکدا ڕایگەیاند: کە وانگ یی وەزیری دەرەوەی چین دوای دەستگیرکردنی نیکۆلاس مادۆرۆ لەلایەن ئەمریکاوە ڕایگەیاند: کە پەکین ناتوانێت هیچ وڵاتێک قبوڵ بکات کە خۆی بە "دادوەری جیهان" بزانێت.

ئاژانسی ڕۆیتەرز بڵاویکردەوە، وەزیری دەرەوەی چین ئیدانەی پێشهاتەکانی ئەم دواییەی ڤەنزوێلا دەکات و جەختی لەوە کردووەتەوە کە هیچ وڵاتێک مافی ئەوەی نییە ڕۆڵی پۆلیس یان دادوەری جیهانی بگرێتە ئەستۆ.

ئاماژەی بەوەشکرد، دەبێت سەروەری و ئاسایشی وڵاتانی دیکە بەپێی یاسا نێودەوڵەتییەکان بپارێزرێت.

مادۆرۆ لە ئێستادا لە ناوەندێکی دەستبەسەرکردن لە نیویۆرک ڕاگیراوە و بڕیارە ڕۆژی دووشەممە بە تۆمەتی بازرگانیکردن بە ماددە هۆشبەرەکانەوە لە دادگا ئامادە بێت.

بەگوێرەی ڕاپۆرتەکە، چین ساڵانێکە هەوڵی بەهێزکردنی ڕۆڵی دیپلۆماسی جیهانی خۆی دەدات، سەرکەوتنی لە دانوستانە بازرگانییەکانی لەگەڵ ئەمەریکا و نێوەندگیری نێوان سعودیە و ئێران لە ساڵی 2023، بووەتە هۆی زیادبوونی "متمانە بەخۆبوون"ی ئەو وڵاتە.

هاوکات بانگەشەی دۆناڵد ترەمپ کە ئێستا ئەمریکا سەرپەرشتی حکومەتی ڤەنزوێلا دەکات، تاقیکردنەوەیەکی بەرچاوە بۆ هاوبەشی ستراتیژی چین و ڤەنزوێلا.

 

 

 

گوڵان: سەردار خەلیل