خانمە هونەرمەندی ئێرانی ئانا جیهانبەخش بۆ گوڵان:بۆ من شەهرام نازری و عەلی ئەكبەر مورادی ئیلهام بەخش بوون
ئانا جیهانبەخش لە تارانی پایتەختی ئێران لە بنەماڵەیەكی هونەردۆست لەدایك بووە، دایكی گۆرانیبێژ و مامۆستای گۆرانیی ڕەسەنی فارسییە، ئەویش هەر لە هەرزەكارییەوە لەگەڵ مۆسیقا و هونەردا ژیاوە، دواتر ڕووی لە دەرەوەی ئێران كرد و، ئەزموونی كۆچبەری ئاسۆی نوێی بۆ كردەوە وەك گۆرانیبێژێك.
*ژیان لە دەرەوەی وڵات كاریگەریی لەسەر ناسنامەی هونەریت هەبووە؟
-بە دڵنیاییەوە بەركەوتن بە كەلتوورە جیاوازەكان دیدگای منی فراوانتر كرد و كارە هونەرییەكانم زیاتر فرەچین كرد، بۆ ئەوەی بتوانم بە شێوەیەكی ڕاستەوخۆ كاری جوانتر بە هزر و بیركردنەوەی فراوانتر پێشكەش بكە. ژیانی نوێم لە دەرەوەی وڵات جیهانێكی فراوانتری بۆ كردمەوە.
*چۆن هاوسەنگی لە پاراستنی ڕەگوڕیشەی ئێرانی و گونجاندن لەگەڵ كەلتووری ئەو وڵاتەی تێیدایت، دەپارێزیت؟
-بە هەڵبژاردنی هۆشیاریی مۆسیقا و جلوبەرگ و جۆری نمایشەكانم. هەوڵ دەدەم هاوسەنگییەك لە نێوان زیادكردنی هۆشیاری لە ڕەسەنایەتی و تێگەیشتن لە مۆسیقای هاوچەرخدا دروست بكەم، لە هەمان كاتدا ئیلهامم لە دیمەنە كەلتوورییە نوێیەكە وەرگرتووە، ئەم دووانەیە لای من ململانێ نییە، بەڵكو دەرفەتێكە بۆ داهێنان.
*كەی خولیای هونەر و مۆسیقات لە ناخی خۆتدا دۆزییەوە و چی ئیلهامبەخش بوو بۆ ئەوەی بچیتە ناو ئەم بوارەوە؟
-مۆسیقا هەمیشە بەشێك بووە لە ژیانم، دەنگی داپیرەم كە بە كەمانچەكەی گۆرانی دەگوت و باپیرم كە بە تەواوی ئاكۆردەكانی دەنگی دەزانی، سەرەتای ئەم هەستە ناوەكییە بوون. دایكم كە گۆرانیبێژێك بوو بە خۆشەویستییەوە و سەرەڕای هەموو سنوورداربوونەكانی، ئەم دەنگانە بوونە دەنگی ناخی خۆم و لە هەموو ساتەكانی ژیانمدا خولیای گۆرانیگوتنیان دروست كرد.
*پەرەسەندنی مۆسیقای ئێران لەژێر ڕۆشنایی پێشكەوتنی جیهانیدا چۆن دەبینن؟
-مۆسیقای ئێرانی سنوورەكان دەبەزێنێت، سەرەڕای ئالنگارییەكان، هونەرمەندان ڕێگەیان بۆ جیهانگیری دۆزیەوە. هاوكاریی هونەرمەندانی ئێرانی لەگەڵ كەسانی غەیرە ئێرانی، تێكەڵەیەكی جوان و سەرنجڕاكێش و فرەزمانیی دروست كردووە.
*دیارترین ئالنگاری ئەمڕۆی هونەرمەندانی ئێرانی لە ناوخۆ و دەرەوەی ئێران چین؟
-لە ناوەوە سنوورداربوونی دەربڕین و نەبوونی پلاتفۆرمی پشتیوانی، دووری لە وڵات، هەندێك جار ڕووبەڕووی كۆنەپەرستان و دۆزینەوەی ڕێگەی نوێی پەیوەندیكردن دەبنەوە، بەڵام لە هەردوو فەزاكەدا هەوڵدان بۆ بیستن و دروستكردنی پەیوەندییەكی ڕاستەقینە لەگەڵ بینەردا، تەحەدای هاوبەشی ئێمەیە، كە دەتوانرێت لە ڕێگەی كاری باش و دەربڕینی دروستی هەستەكانەوە بەدەست بهێنرێت.
*ئایا مۆسیقای ئێرانی توانیویەتی ناسنامەی خۆی بپارێزێت و لە هەمان كاتدا زیاتر ناسراو بێت؟
-بەڕای من بەڵێ، مۆسیقای ئێرانی سەرەڕای ئاڵۆزی و وردبینییەكانی، توانیویەتی سەرنجی زۆرێك لە خەڵكی غەیرە ئێرانییش ڕابكێشێت. داهێنان لە مۆسیقای ئێرانیشدا بەشدارییەكی زۆری لە ناساندنی زیاتری كردووە.
*تەكنەلۆژیا، وەك پلاتفۆرمی پەخشی ڕاستەوخۆ و سۆشیال میدیا، چۆن كاریگەریی لەسەر بڵاوبوونەوەی كارە هونەریەكانت هەبووە؟
-فەزای دیجیتاڵی دەستی منی كردووەتەوە بۆ ئەوەی پەیوەندیم لەگەڵ بینەری جیهانیدا هەبێت بەبێ نێوەندگیر، زۆرێك لە گوێگرانم لە ڕێگەی ئەم پلاتفۆرمانەوە ئاشنای كارەكانم بوون.
*سوود و زیانەكانی بەكارهێنانی تەكنەلۆژیا لە بەرهەمهێنان و دابەشكردنی مۆسیقادا چین؟
-سوودەكەی دەستڕاگەیشتن بە ئاسانی و جیهانگیرییە، توانای پەخشكردنی بەبێ نێوەندگیر، بەڵام لە لایەكی دیكەوە كوالێتی و قووڵایی كارەكە هەندێك جار لە خێرایی فەزای ئەلیكترۆنی و لە فرەیی بەرهەمەكاندا لەدەست دەچێت.
*تا چەند ئاشنای هونەر و مۆسیقای كوردیت و ئایا هونەرمەندی كورد هەیە كاریگەریی لەسەرت دروست كردبێت؟
-مۆسیقای كوردی بۆ من هەمیشە پڕ لە سۆزی قووڵ بووە، تا ئەو ڕادەیەی كە لە ئێستادا لەگەڵ خانمە گۆرانیبێژە كوردەكان كاری مۆسیقی ئەنجام دەدەین. ئامێری تانبور و گۆرانی كوردی پڕە لە هەستی خۆشەویستی و هاودەنگی، بەرهەمەكانی عەلی ئەكبەر مورادی و شەهرام نازری (لە فەزای كوردیدا) بۆ من ئیلهامبەخش و ناوازەن.
*ئایا هیچ لێكچوونێك لە نێوان مۆسیقای فارسی و كوردیدا لە ڕووی ستایل، یان تەوەرەوە دەبینیت؟
-بەڵێ، هەردووكیان ڕەگ و ڕیشەیان لە شیعر و ئازار و خۆشەویستی و گێڕانەوەی ژیاندا داكوتاوە، لە ڕووی پێكهاتەوە لە هەندێك گۆشە و مەودا هاوشێوەن، و بە تێپەڕبوونی كات كاریگەرییان لەسەر یەكتر هەبووە.
*چۆن هاوكاریی نێوان هونەرمەندانی فارس و كورد دەتوانێت یارمەتیدەر بێت بۆ بەرەوپێشبردنی ئاڵوگۆڕی كەلتووری؟
-مۆسیقا زمانێكی فرانتەیشناڵە و كاتێك هونەرمەندان لە نەتەوە جیاوازەكانەوە كۆدەبنەوە، پەیامی یەكگرتوویی و ڕێزگرتن و هەمەجۆریی كەلتووری بە جیهان دەگەیەنن.
*تا ئێستا كارت لەسەر پڕۆژەیەكی هونەری كردووە كە ئیلهام لە توخمەكانی كەلتوری كوردییەوە وەرگیرابێت یان تیایدا تیادا هاتبێت؟
-بەڵێ ئەم هاوكارییانە دەتوانن پردێك بن لە نێوان دڵماندا، لەم ڕووەوە گرووپەكەمان خەریكی دروستكردنی گۆرانیی دوو زمانە كە بەم زووانە لەلایەن من و گۆرانیبێژانی كوردەوە پێشكەش و پەخش دەكرێن.
*هونەر چ ڕۆڵێكی هەیە لە بەرەوپێشبردنی گفتوگۆ لە نێوان كەلتوورە جیاوازەكاندا؟
-هونەر زمانی هاوبەشی مرۆڤایەتییە، لەو شوێنەی وشەكان شكست دەهێنن، هونەر قسە دەكات، جا چ لە كاتی خۆشەویستی یان لە ناو شەڕدا بێت. لە ڕێگەی هونەرەوە دەتوانین لە جیاوازییەكان تێبگەین و لێكچوونەكان بدۆزینەوە و گفتوگۆیەكی ئینتیمای و مرۆیی و قووڵ لە نێوان كەلتوورەكاندا پێك بهێنین.
