ژیلە ئامانج خانمە گەنجێكی پڕ وزە و پڕ جولەیە، وێڕای ئەوەی كە مامۆستای زمانی ئینگلیزییە بەڵام وەك زۆرینەی ئافرەتان خۆشەویستییەكی لە ڕاددەبەدەری بۆ چێشتخانە و دروستكردنی خواردن هەیە. ژیلە ئامانج لە شاری هەولێر لە دایك بووە و ماوەی دوو ساڵە لە دەرەوەی كوردستان ژیان دەكات و لە ڕێگەی تۆڕە كۆمەڵایەتییەكانەوە فێركاری چۆنیەتی دروستكردنی خواردن و شیرینییەكانی بڵاو دەكاتەوە. لە دیدارێك لەگەڵ گۆڤاری گوڵان كارەكانی ڕۆژانەی بۆ خوێنەران باس دەكات.

 

گوڵان: كۆمەڵایەتی

 

«پەیجەكەم فێركارییە جگە لەوەی كە لە فەیسبووك لە ئینستاگرام و تیك تۆك و سناپ فێركارییەكانم دادەنێم. كار و چالاكییەكانی دیكەشم هەر لەناو پەیجەكانمدا هەیە. هۆكاری هاتنە ناو كاری سۆشیال میدیا كاریگەری و هاندانی خوشكەكەم بوو كە وای كرد بێمە ناو ئەو بوارە، من خوم مامۆستای زمانی ئینگلیزیم، لە كوردستان بەڕێوەبەری قوتابخانەی فێنكی ئەهلی بووم، لە هەمان كاتیشدا كاری میدیاییم كردووە و بابەتی كومەڵایەتی و پەروەردەییم نووسیوە، هەروەها پێشكەشكاری بەرنامەی هونەری بووم لە كەناڵی نێت تیڤی، جگە لەوەی وەك چالاكێكی مەدەنی كاری ڕێكخراوەییم لە ڕێكخراوەكانی ئافرەتان كردووە. ئەمڕۆش لە ڕێگەی سۆشیال میدیاوە بابەتی فێركاری و خواردن دروست كردن لەگەڵ بینەرەكانم ئەنجام دەدەم، وەك هاوكاری و یارمەتیدانێك بۆ ئافرەتان».

لە وەڵامی ئەو پرسیارەی كە ئاخۆ ئەو بەربەست و ڕێگرییانەی كە هاتنە سەر ڕێگەی دەركەوتنت چی بوون؟ دەڵێت: «لە ڕووی خیزانییەوە بەربەستم نەبوو، هەموو ئەندامانی خێزانەكەم بەردەوام هانم دەدەن، تەنانەت هاوسەرەكەشم لە كارەكانم زۆر پاڵپشتمە. دیارە لە كۆمەڵگەی كوردیدا ئافرەت بوون قورسە بەتایبەت دەركەوتنی لە بواری ڕاگەیاندن، بۆیە بەشێك لە تاكەكانی كۆمەڵگە لەگەڵ هەمان ڕا و بۆچوونی تۆ نین و هەندێكجار قسەی نەشیاو یاخود كۆمێنتی ناشیرین دەنووسن. بەڵام خۆشبەختانە لەبەر ئەوەی من لەو كارانەی كە لە بواری ڕاگەیاندندا كردوومن كلتوور و دابونەریتی كوردەواریم لە بەرچاو گرتووە و هیچ كارێك ناكەم كە پێچەوانەی خواستی كۆمەڵگە بێت، (90%) ی بینەرەكانم پشتگیریی و پاڵپشتیان كردووم و وایان لێكردووم لە كارەكانم بەردەوام بم، ئەو (10%) كە جار جار قسە و كۆمێنتی نەشیاو دەكەن دەتوانم بڵێم حەسادەتە، كە ناتوانن وەك ئەوانی دیكە خزمەت بكەن. بێگومان قسەی نەشیاوت لەسەر دەكەن».

گوتیشی: «گرنگ و پێویستە كچان و ئافرەتان ئیش بكەن تاوەكو خاوەنكار و داهاتی خۆیان بن، بە شێوەیەكی گشتی، ئەو كچ و ئافرەتانەی كار دەكەن، جگە لەوەی كە بەهێزن هاوكات سەربەخۆیی ئابووری بە دەست دێنن و بۆ خێزان و كۆمەڵگە و داهاتوو بەرهەمێكی جوان پێشكەش دەكەن.

كاركردن بۆ ئافرەتان بە واتایەكی جوان دێت و هیچ كات نامۆ نەبووە بە خەسڵەتی ئافرەتی كورد، وەك دەزانین ئافرەتانمان بە درێژایی مێژوو لەگەڵ باوك و برا و هاوسەرەكانیان لە ڕایی كردنی كاروباری ڕۆژانەدا بەشدارێكی كارا بوون، تەنانەت لە ڕۆژانی سەختی پێشمەرگایەتی و ئاوارەییدا هاوكار و هاوسەفەر بوون، بەڵام بەداخەوە ئەمڕۆ كاركردنی ئافرەت لای زۆرینەی خێزانەكان بە گرنگ نازاندرێت، لە كاتێكدا دەستكەوتە گرنگەكەی كاركردنی ئافرەت بڕوا بە خۆبوونە، بڕوا بە خۆبوونیش بۆ ئافرەت هێز و دەسەڵاتە هەم بۆ خوی و هەم بۆ خێزان و تەنانەت بۆ منداڵەكانیشی، واتە دەتوانێت بەرپرسیارێتی خۆی و تاكەكانی خێزانەكەشی هەڵبگرێت، لە داهاتوودا دەتوانێت كاریگەری لەسەر منداڵەكانی دروست بكات وەك دایكێكی خاوەنكار، فێری كار و متمانە بەخۆبوونیان بكات تاوەكو لەئاییندەدا بتوانن لەسەر پێی خۆیان بوەستن.

ئافرەتان پێویستە كار بكەن، هەر تەنیا بۆ پارە پەیداكردن نا بەڵكو بۆ بەرزكردنەوەی ئاستی هۆشیاری تاكەكانی كۆمەڵگە بەرانبەر بە لایەنە ئەرێنییەكانی تێكۆشانی خانمان و دروستكردنی كۆمەڵگەیەكی هاوبەش و بەهێز».

‎سەبارەت بە ئامانجی كارەكەشی دەڵێت: «ئامانجی سەرەكیم فێركردن و ئاڵوگۆڕكردنی زانیارییە لەگەڵ بینەرەكانم، هەموو كات سەرنجم لەسەر ئەوەیە بە كەمترین كەرەستە خواردن و شیرینی دروست بكەم و فیركارییەكەی دابنێم، لەبەر ئەوەی ڕەنگە زۆرینەی خانمان هەموو جۆرە كەرەستەیەك لە ماڵەكانیدا نەبێت و نەتوانن دروستی بكەنەوە. لە لایەكی دیكەوە فێركارییەكانم ئاسانكارییەك دەبێت بۆ ئەو خاتوونانەی كە تازە ژیانی هاوبەشیان پێكهێناوە و تا ئێستا نازانن خوانێك ئامادە بكەن، ئەوان دەتوانن لێرەوە خۆیان فێر بكەن».

ژیلە ئامانج لە كۆتایی قسەكانیدا گوتی: «دڵخۆشی من لە كارەكەم ئەوەیە كە ئەو زانیارییانەی هەمە بڵاوی بكەمەوە بۆ ئەوەی خەڵك بە گشتی سوودی لێ وەربگرن، بگرە من هیچ قازانجی مادددیم لەو كارەدا نییە، تەنیا خۆشەویستی خەڵك و سوودگەیاندنم بە بینەرەكانم بۆ من هەموو شتێكە.

‎پلانم بۆ كارەكەم زۆرە، یەكێك لەم پلانانەم ئەوەیە حەز دەكەم كەمپینێكی خێرخوازیم هەبێت و بتوانم ڕۆژانە خواردن بۆ سەدان كەسی هەژار و دەستكورت دابین بكەم».