نـێــچــیرڤـــان بـــارزانی، سەرۆکی هەرێمی کوردستان، پێشوازیی لە بەڕێز پاتریک دورێل، باڵیۆزی فەرەنسا لە عێراق کرد.
دوێنێ ئێوارەی دووشەممە 2025/6/30 بەڕێز نێچیرڤان بارزانی، سەرۆکی هەرێمی کوردستان، پێشوازیی لە بەڕێز پاتریک دورێل، باڵیۆزی فەرەنسا لە عێراق کرد.
لە دیدارێکدا، پەیوەندییەکانی فەرەنسا لەگەڵ عێراق و هەرێمی کوردستان تاوتوێ کرا و هەروەها بیروڕا دەربارەی دۆخی گشتیی عێراق و هەرێمی کوردستان، دەرفەتی وەبەرهێنان و بازرگانی بۆ کۆمپانیا فەرەنسییەکان لە عێراق و هەرێمی کوردستان، ئاڵوگۆڕ کرا.
هەردوولا جەختیان لە چارەسەرکردنی کێشەکانی نێوان هەردوو حکوومەتی فیدراڵی عێراق و هەرێمی کوردستان بە ڕێگەی دیالۆگ و لەسەر بنەمای دەستووری عێراق، کردەوە.
لە تەوەرێکی دیکەی دیدارەکەدا، باس لە دوا پێشهاتەکانی ڕۆژهەڵاتی ناوەڕاست کرا و لەمبارەیەوە هەردوولا گرنگیی پاراستنی ئارامی و سەقامگیریی ناوچەکەیان دووپات کردەوە و داکۆکییان لە پێویستیی دوورخستنەوەی عێراق لە کێشە و ئاڵۆزییەکانی ناوچەکە، کردەوە.
تاوتوێکردنی چەند بابەتێکی جێی بایەخی هاوبەش، لایەنێکی دیکەی دیدارەکە بوو کە بەڕێز یان برێم، کونسوڵی گشتیی فەرەنسا لە هەرێمی کوردستان ئامادەی بوو.
