تەرمی مۆمیاکراوی ٦٠ کەس لە گۆڕێكی سوتێنراو لە ویلایەتی چیواوا لە باکووری مەکسیک دۆزرایەوە.

بەگوێرەی هەواڵی میدیا ناوخۆییەکان، پۆلیسی مەکسیک دوای ئەوەی خەڵکی ناوچەکە گلەییان هەبووە و هەستیان بە بۆنێکی ناخۆش کردووە لێکۆڵینەوەی لە سووتاندنی گۆڕێك لە ویلایەتی چیواوا کردۆتەوە، و تەرمی مۆمیاکراوی ٦٠ کەسیان دۆزیوەتەوە.

لێکۆڵینەوە سەرەتاییەکان ئاماژە بەوە دەکەن کە بەشێک لە تەرمەکان چەند مانگێک لەمەوبەر دۆزراونەتەوە، هەندێکی دیکەش دەستیان بە شیبوونەوە کردووە.

تیمێکی پزیشکی دادوەری و ئۆتۆمبێلی ساردکەرەوە ڕەوانەی شوێنی ڕووداوەکە کران، لێکۆڵینەوەی دادوەریش لەبارەیەوە دەستیپێکرد.

شایانی باسە کە دوێنێ لە هەڵکۆڵینەکاندا کە لە گۆڕێکی نهێنی لە ویلایەتی جالیسکۆ ئەنجامدراوە، ٣٤ تەرم و ١٦٩ کیسە دەرکەوتووە کە پاشماوەی مرۆڤیان تێدابووە.

 بەگوێرەی ئامارە فەرمییەکان، زیاتر لە 127,000 کەس لەو وڵاتەدا بێسەروشوێنن.

 

 

 

گوڵان: سەردار خەلیل