لە درێژەی شەڕی گومرگی، میدیاکانی چین بڵاویان کردەوە کە حکومەتی ئەو وڵاتە باجی زیادە لەسەر کاڵا هاوردەکراوەکان لە ئەمریکاوە بۆ 84% زیاد دەکات وەک تۆڵەسەندنەوەیەک.

شینهوا ڕۆژی چوارشەممە، 09-04-2025، لە ڕاپۆرتێکدا ڕایگەیاند: کە حکومەتی چین باجی زیادە لەسەر ئەو کاڵایانە زیاد دەکات کە لە ئەمریکاوە هاوردە دەکرێن بۆ لەسەدا ٨٤ وەک تۆڵەسەندنەوەیەک.

بەگوێرەی ڕاپۆرتی شینهوا، کۆمیسیۆنی باجی دەوڵەتی چین ڕایگەیاندووە: کە ئەم هەنگاوە لە کاردانەوەیەکدایە بۆ سەپاندنی باجی زیادەی ٥٠٪ لەسەر کاڵای چینی لەلایەن دۆناڵد ترەمپ، سەرۆکی ئەمریکاوە.

ئەم کۆمیسیۆنە ڕایگەیاندووە، کە ئەم باج زیادانە لە نیوەڕۆی ڕۆژی پێنجشەممە، 10-04-2025، دەچێتە بواری جێبەجێکردنەوە.

ئەو باجانەی کە دۆناڵد ترەمپ لەسەر کاڵا هاوردەکراوەکان لە چین و وڵاتانی دیکەوە سەپێنراون، ئەمڕۆ کەوتە بواری جێبەجێکردنەوە.

ترەمپ، باجی گومرگی لەسەر کاڵاکانی هاوردەکراو لە چینەوە بۆ لە سەدا 104 بەرزکردۆتەوە و هەروەها ڕووبەڕووی تۆڵەسەندنەوە بووەتەوە لەلایەن ئەو وڵاتە.

حکومەتی چین ئەم کارانەی دۆناڵد ترەمپ بە "گێچەڵکردنی ئابووری" ناودەبات و دەڵێت، ئەم کارانە زیان بە سیستەمی بازرگانی هەمەلایەنە دەگەیەنێت و سیستەمی ئابووری جیهان تێکدەدەن.

 

 

 

گوڵان: سەردار خەلیل