سەرچاوە میدیاییەکان باسیان لە هێرشە نوێیەکانی ڕووسیا بۆ سەر ئۆکرانیا کردووە و ڕایانگەیاندووە کە لەم هێرشانە ١١ کوژراو و ٣٠ برینداری لێکەوتووەتەوە.

وەزارەتی ناوخۆی ئۆکرانیا بڵاویکردەوە، هێرشەکان شەوی ڕابردوو لە شاری دۆبرۆپلیا کە دەکەوێتە ڕۆژهەڵاتی ئۆکرانیا ئەنجامدراون.

وەزارەتی ناوخۆی ئۆکرانیا ئاماژەی بەوەشکردووە، ڕووسیا بە بەکارهێنانی فڕۆکەی بێفڕۆکەوان و چەندین موشەک هێرشی کردووەتە سەر شارەکە.

بەگوێرەی ئەو ڕاپۆرتە، لەو هێرشەدا پێنج منداڵیش کوژراون.

بەرپرسانی ئەمنی ئۆکرانیا پشتڕاستیان کردەوە کە موشەکەکان بەر باڵەخانە و ئۆتۆمبێل و شوێنی نیشتەجێبوون کەوتوون.

تا ئێستا مۆسکۆ هیچ لێدوانێکی لەسەر هێرشەکە نەداوە.

ئەم هێرشانە لە کاتێکدایە کە هەوڵەکانی ئەمریکا بۆ کۆتایی هێنان بە شەڕی نێوان ڕووسیا و ئۆکرانیا بەردەوامە.

 

 

 

گوڵان: سەردار خەلیل