سەرۆکی هەرێمی کوردستان و جێگری وەزیری دەرەوەی ئێران ئەمڕۆ کۆبوونەوە، بیروڕایان لەبارەی چەند تەوەرێک گۆڕییەوە و هاوڕا بوون لەسەر پەیڕەوکردنی دیالۆگ بۆ چارەسەرکردنی کێشەکان.
 
نێچیرڤان بارزانی، سەرۆکی هەرێمی کوردستان ئەمڕۆ (چوارشەممە، 26-2-2025) لە پەراوێزی كاره‌كانى سێيه‌مين كۆڕبه‌ندى هەولێر، لەگەڵ سەعید خەتیبزادە، جێگری وەزیری دەرەوەی كۆمارى ئيسلاميى ئێران، كۆبووه‌وه‌.
 
لە كۆبوونه‌وه‌كه‌دا پەیوەندیيەکانی هه‌رێمى كوردستان و ئێران و چۆنیێتیی بەهێزکردنی هاوکاریی هاوبەشيان له‌ بواره‌ جياكاندا تاوتوێ کرا، هەروەها لە‌باره‌ى دۆخى عێراق و هه‌رێمى كوردستان و دوایین پێشهاته‌كانى ناوچەکە، بيروڕايان گۆڕييه‌وه‌.
 
سەرۆکایەتیی هەرێمی کوردستان دەڵێ "هەردوولا جەختیان لە گرنگیی بەردەوامیی پەیوەندی و هەماهەنگی کردەوە بۆ بەهێزکردنی پەیوەندییەکان؛ بە جۆرێک کە خزمەت بە بەرژەوەندییە هاوبەشەکانی هەردوولا بکات."
 
لە کۆبوونەوەکەدا نێچیرڤان بارزانی و سەعید خەتیبازدە له‌سه‌ر پێویستیی پەیڕەوکردنی دیالۆگ و لێکگەییشتن بۆ چارەسەرکردنی کێشه‌كان و بەهێزکردنی سەقامگیری لە ناوچەکەدا، هاوڕا بوون.
 
چه‌ند پرسێكى ديكه‌ى جێى بايه‌خى هاوبه‌ش، ته‌وه‌رێكى ديكه‌ى كۆبوونه‌وه‌كه‌ بوو.
 

دیمەنێکی دیکەی کۆبوونەوەکە. وێنە: سەرۆکایەتیی هەرێمی کوردستان
 
سەعید خەتیبزادە، جێگری وەزیری دەرەوە و سەرۆکی پەیمانگەی توێژینەوە سیاسی و نێودەوڵەتییەکانی وەزارەتی دەرەوەی ئێرانە، ئەمڕۆ یەکێک بوو لە پانێڵیستەکانی "داهاتووی سووریا لەدوای ئەسەد؛ داڕشتنەوەی پێکهاتەی ئەمنی و سیاسی لە ناوچەکە" لە یەکەم رۆژی کۆڕبەندی هەولێر دا. 
 
کۆڕبەندەکە بە ناونیشانی "نادڵنیاییە کەڵەکەبووەکان لە داهاتووی رۆژهەڵاتی نێوەڕاست دا"، زەوینەی گفتوگۆ و پێشنیازی چارەسەر بۆ دۆخی سووریا، تورکیا، عێراق و ناوچەکە دەڕەخسێنێت، لەگەڵ دەرفەتەکان بۆ چارەسەری پرسی کورد لە هەر چوار وڵاتدا.
 
کۆڕبەندی ساڵانەی هەولێر ئەمڕۆ دەستیپێکرد و تاوەکو 28ـی مانگ بەردەوام دەبێت. ناوەندی لێکۆڵینەوەی رووداو، بەهاوبەشی لەگەڵ ژمارەیەک لە ناوەندە دیارەکانی لێکۆڵینەوە و دامەزراوەکان لەسەر ئاستی رۆژهەڵاتی نێوەڕاست و جیهان، بەڕێوەیدەبات.