چێژكردن هەستێكی ئاڵۆزە و بە گەلێك فاكتەر تێك دەچێت، هەستكردن بە چێژی تاڵ Bitter taste لە دەمدا هۆكاری جیاوازی لەپاڵە، كە بریتین لە: وشكبوونی دەم لەبەر هەر هۆكارێك، چونكە هاندەر دەبێت بۆ زیادبوون و گەشەكردنی بەكتریا لە ناو بۆشایی دەمدا، گرفتەكانی پووك و ددان، بەتایبەتی هەوكردنی پووك و كلۆربوونی ددان، دووگیانی لە ئەنجامی گۆڕانی بەرچاوی هۆرمۆنەكان، وەستانی یەكجارەكی سووڕی مانگانەی ئافرەت Menopause لەبەر كەمبوونەوەی ئاستی هۆرمۆنی ئیسترۆجین لە لەشدا، گەڕانەوەی ترشەڵۆكی گەدە بۆ بەشی خوارەوەی سوورێنچك، كە لەوانەیە بگاتە قوڕگ و دەم، هەوكردنی دەم بە كەڕووی كاندیدا Candida، خواردنی دەنكی سنۆبەر Pine nut، سترێس و پەستی كە وروژێنەرن بۆ بەرزبوونەوەی ئاستی هۆرمۆنەكانی سترێس و زیادبوونی ئەگەری وشكبوونی دەم، هەوكردنی جیوبەكانی لووت، زیانی لابەلای بەكارهێنانی چەند دەرمانێك، بەتایبەتی ئەوانەی كە دەبنە هۆی وشكبوونی دەم، بۆنموونە: چارەسەری كیمیایی یان چارەسەری تیشكی بۆ شێرپەنجە، هەروەها نەخۆشیی دەمارەكانی مێشك وەكو پەركەم، ئیفلیجبوونی دەماری دەموچاو (دەماری حەفتەم)، یان گرێی مێشك. هەنگاوەكانی چارەسەركردن: دۆزینەوەی هۆكارەكان و چارەسەركردنیان لە لایەن دكتۆر، گرنگیدان بە پاكوخاوێنیی دەم و ددان، خواردنەوەی بڕێكی باشی ئاو و شلەمەنی، بەكارهێنانی غەرغەرەی دەم، لەگەڵ دووركەوتنەوە لە جگەرەكێشان.