دەزگاکانی چاپ و بڵاوکردنەوەی کتێب لە رۆژهەڵاتی کوردستان بە دۆخێکی سەختدا تێدەپەڕن
یەکێک لەو دەزگایانە، کتێبخانەی کتێبی مانگە، کە دەزگایەکی چاپ و بڵاوکردنەوەیە و لە 7 ساڵی چالاکیی خۆیدا، زیاتر لە 400 ناونیشانی کتێبی بەتایبەت لە بوارەکانی ئەدەبیات، منداڵان و لێکۆڵینەوە کوردییەکاندا چاپ و بڵاوکردوونەتەوە. ئێستا بەهۆی کەمبوونەوەی داهات و زیادبوونی خەرجییەکانی، پێشانگاکەی کۆدەکاتەوە.
کێشەکانی دەزگاکانی چاپ و بڵاوکردنەوەی رۆژهەڵاتی کوردستان یەک و دوو نین. نرخی کاخەز، چاپ و هەموو تێچووەکانی دیکە چەند هێندە بەرزبووەتەوە. ئەوەش بووەتە هۆی گرانبوونی نرخی کتێب.
دۆخی ئابووریی خراپی خەڵک و گرانبوونی کتێب، هۆکارن بۆ کەمبوونەوەی کڕین. لەم دۆخەدا، شوێنی وەکو ئەم پێشانگایە وەکو ناوەند بوون بۆ پێدانی کتێب بە خەڵک و گردبوونەوەی نووسەر، وەرگێڕ و خوێنەران لەدەوری یەکدی.
دۆخی مانگ مشتێکە لە خەروارێک؛ دەزگاکانی چاپ و بڵاوکردنەوەی دیکەش بەو دۆخەدا تێدەپەڕن. لە بانە، بەڕێوەبەرانی مانگ داوایان لە کەسانێک کردووە، کە لەڕووی ئابوورییەوە دەستڕۆیشتوون، تاوەکو پشتیوانییان بکەن پیشانگاکە دانەخرێت، بەڵام هاوکارییان نەکردوون.
rudaw -
